ექსპერტი ეკონომიკურ საკითხებში რომან გოცირიძე დეფიციტური ხარჯვის დიდ ნაწილს კვლავ ნოემბერ-დეკემბრის თვისთვის პროგნოზირებს.

მისი თქმით, მთავრობას ჰქონდა შანსი, დროზე შეემცირებინა ბიუჯეტი, ახლა უკვე გვიანაა.
,,გასული წლების მანკიერი ტრადიცია არც წელს დარღვეულა. ბიუჯეტის ხარჯებმა შვიდი თვის განმავლობაში 5,297 მილიარდი ლარი, ანუ საშუალოდ თვეში 757 მილიონი ლარი შეადგინა. დარჩენილ ხუთ თვეში უნდა დაიხარჯოს 4,278 მილიონი ლარი, ანუ საშუალოდ 855 მილიონი ლარი თვეში. ეს იმას ნიშნავს, რომ დეფიციტური ხარჯვის დიდი ნაწილი კვლავ ნოემბერ-დეკემბრის თვეს დააწვება. 
მთავრობას ჰქონდა შანსი, დროზე შეემცირებინა ბიუჯეტი. ახლა უკვე გვიანაა. პირიქით, ელექტროენერგიის სუბსიდირებისათვის და თბილისის მერიის ხარბი მადის დასაკმაყოფილებლად დამატებითი ხარჯებია გასაწევი. 
ხელისუფლება უკვე ვერ გადააბრალებს თავის არაკომპეტენტურობას საგარეო ფაქტორებს. საშინაო საფრთხობელოების თემაც ( ბოროტი ეროვნული ბანკი, სპეკულიანტი კომერციული ბანკები, არაობიექტური საერთაშორისო ორგანიზაციები, ცუდი ექსპერტები, მავნებელი ჟურნალისტები და ასე შემდე) უკვე საკმაოდ გაცვეთილია. ვნახოთ რას მოიფიქრებენ ახალს, თავის მართლების მიზნით”, - აცხადებს ექსპერტი.