აჭარის ტურიზმისა და კურორტების დეპარტამენტის ინფორმაციით, 2015 წლის ბოლოსთვის აჭარის სასტუმრო სექტორს 2080 დამატებითი ადგილი შეემატება.
საქართველოს ტურიზმის ეროვნული ადმინისტრაციის ხელმძღვანელის გიორგი ჩოგოვაძის თქმით, ეს კონკურენციის ზრდას და ფასის კლებას გამოიწვევს.
შეუშლის თუ არა ფასის შემცირებას ხელს დენის ტარიფის გაძვირება, გიორგი ჩოგოვაძემ ”ჯი-ეიჩ-ენს” განუმარტა, რომ ტურიზმის ეროვნული ადმინისტრაცია საფასო პოლიტიკაში ვერ ერევა.
შეგახსენებთ, რომ სააგენტო ”ჯი-ეიჩ-ენმა” რამდენიმე დღის წინ გამოკითხა აჭარაში მდებარე სასტუმროები. კერძო სექტორის წარმომადგენლებმა განგვიმარტეს, რომ ტარიფის გაძვირება, ხარჯის ზრდას გამოიწვევს, რაც მათ საქმიანობაზე უარყოფითად აისახება.
”სასტუმროს დიდი ელექტროენერგია სჭირდება, განსაკუთრებით ზაფხულში. მაგალითად, მთელი დღეა ჩართულია კონდიციონერი, რასაც დიდი ხარჯი აქვს. ამჟამად ერთ ადგილიანი ნომრის ფასი 50 ლარს შეადგენს, ტარიფის მომატების შემთხვევაში, ეს ფასი, რა თმა უნდა, გაიზრდება” _ განაცხადა სასტუმრო ”ბიჩ ჰაუზის” მფლობელმა კახაბერ ბერიძემ.
მის აზრს იზიარებს ურეკში მდებარე სასტუმროების ნაწილიც.
