ბათუმში ბარაკების ნაცვლად ახალ საცხოვრებელ სახლის მშენებლობა დაიწყო. ახალი საცხოვრებელი სახლის მშენებლობა შპს „ბათუმი ბილდინგმა“ „ახალი საცხოვრებელი სახლები ბათუმში ბარაკების ნაცვლად“ პროგრამის ფარგლებში დაიწყო.
საცხოვრებელი სახლის მშენებლობით 1,5 მლნ დოლარის ინვესტიცია განხორციელდება. 12 სართულიან შენობაში 73 ბინა განთავსდება. პროექტში ჯამში 50 ადამიანი დასაქმდება. ტერიტორიაზე კომპანიამ 789 კვ.მეტრზე განთავსებული 3 სახლის დემონტაჟი უკვე განახორციელა.ოჯახებზე გაცემულმა კომპენსაციამ 127,500 დოლარი შეადგინა. ოჯახებს ახალ საცხოვრებელ სახლში საკუთრებაში სულ 1090 კვ.მ ფართი გადაეცემა. მშენებლობა 2017 წელს დასრულდება.
აჭარის ა.რ. მთავრობამ აღნიშნული პროგრამა ქ. ბათუმის მერიასთან ერთად, ჯანსაღი და უსაფრთხო საცხოვრებელი გარემოს შექმნისთვის შეიმუშავა. აღნიშნული პროექტით აჭარის რეგიონში მოხდება:
- მოსახლეობის საცხოვრებელი პირობების გაუმჯობესება;
- ქალაქის განაშენიანების ხელშეწყობა;
- ინვესტიციების მოზიდვა და ახალი სამუშაო ადგილების შექმნა;
- სამშენებლო ბიზნესის სტიმულირება.
აჭარის ფინანსთა და ეკონომიკის სამინისტროს ინფორმაციით, პროექტის მიმართ ინტერესი „საქართველოს ბანკმა“ გამოიჩინა, რომელიც უკვე ფლობს მსგავსი პროექტის განხორციელების გამოცდილებას. ”საქართველოს ბანკსა” და აჭარის მთავრობას შორის თანამშრომლობის მემორანდუმს მოეწერა ხელი.
პროექტის მიხედვით ქ. ბათუმის ადმინისტრაციულ საზღვრებში ამორტიზებული, უსახური, ბარაკული ტიპის, არადამაკმაყოფილებელი სანიტარული პირობის მქონე შენობების აღება მოხდება. აჭარის ავტონომიური რესპუბლიკის მთავრობა გამოდის საფინანსო ორგანიზაციის წინაშე დაინტერესებული პირის თავდებად, რომელიც ქ. ბათუმის ტერიტორიაზე ბარაკის ტიპის უსახური შენობების ნაცვლად, მრავალბინიან საცხოვრებელ სახლებს განათავსებს; პროგრამის ფარგლებში თავდებობის თანხის ოდენობა განისაზღვრა - 20 მილიონი აშშ.
დაინტერესებულ მხარესა და საფინანსო ორგანიზაციას შორის მიღწეული შეთანხმების შემდეგ, საკითხს სპეციალური კომისია განიხილავს.
ბარაკების ნაცვლად ახალი საცხოვრებელი სახლების მსენებლობა ბათუმში კიდევ 2 ადგილზე დაიწყება.
.აჭარის ფინანსთა და ეკონომიკის მინისტრმა დავით ბალაძემ დღეს ახალ საცხოვრებელ სახლის მშენებლობას საძირკველი ჩაუყარა. მინისტრმა სიმბოლური კაფსულა კომპანიის დირექტორთან მამუკა მერკვილაძესთან, ქალაქის ვიცე მერთან ბაგრატ მანველიძესთან და საქართველოს ბანკის წარმომადგენელთან არჩილ ჯანყარაშვილთან ერთად ჩადო. დავით ბალაძეს მშენებლობის დეტალები კომპანიის დირექტორმა გააცნო.
