თურქეთის საერთაშორისო თანამშრომლობისა და კოორდინაციის სააგენტო „TIKA“-ს თბილისის საკოორდინაციო ოფისმა აფხაზეთის ავტონომიური რესპუბლიკის მთავრობასთან კოორდინაციით განახორციელა ვაზიანის სამკერვალო ატელიის სარემონტო-აღდგენითი სამუშაოებისა და აღჭურვის პროექტი.
,,TIKA“-ს “-ს თბილისის საკოორდინაციო ოფისმა პროექტის ფარგლებში ქართულ მხარეს გადასცა ტანსაცმლისა და ფეხსაცმლის საკერავი მანქანები, სამკერვალოს ფუნქციონირებისათვისა აუცილებელი ფრიზერის, პრესისა და საშრობი აპარატები, ქსოვილები და ინვენტარი თეთრეულის, ქურთუკებისა და ფეხსაცმლის წარმოებისათვის.
საწარმოში 10 იძულებით გადაადგილებული პირი დასაქმდება.
გახსნის ცერემონია დღეს 16:20 საათზე, გარდაბანის რაიონში, სოფელ ვაზიანში გაიმართება. ღონისძიებას დაესწრებიან: აფხაზეთის ავტონომიური რესპუბლიკის მთავრობის თავმჯდომარის მოვალეობის შემსრულებელი ვახტანგ ყოლბაია, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი, საქართველოს პარლამენტის ტერიტორიული მთლიანობის აღდგენის საკითხთა დროებითი კომისიის თავმჯდომარე გიორგი ვოლსკი, ქვემო ქართლში სახელმწიფო რწმუნებულ-გუბერნატორი პაატა ხიზანაშვილი, რუსთავის მაჟორიტარი დეპუტატი ზვიად ძიძიგური, გარდაბნის მუნიციპალიტეტის გამგებელი გარსევან ნიორაძე, თურქეთის რესპუბლიკის ელჩი საქართველოში მისი აღმატებულება ზექი ლევენთ გიუმრუქჩუ, თურქეთის თანამშრომლობისა და კოორდინაციის სააგენტო ,,TIKA“-ს თავმჯდომარე სერდარ ჩამ, თურქეთის პარლამენტის (მეჯლისი) დეპუტატი ლუთფიე სელვა ჩამ, თურქეთის თანამშრომლობისა და კოორდინაციის სააგენტო ,,TIKA“-ს თბილისის ოფისის კოორდინატორი მუსტაფა ქორქმაზ და სხვა მოწვეული სტუმრები.
