ბათუმს კიდე ერთი ტურისტული ობიექტი შეემატა. ბათუმში დღეს მრავალფუნქციური სასტუმრო და ბიზნეს-ცენტრის "Grand Hotel Batumi Black Sea"-ს საწყალოსნო გასართობი კომპლექსი "Palma Laguna" გახსნა.
გახსნას, აჭარის მთავრობის თავმჯდომარე არჩილ ხაბაძე და აჭარის ფინანსთა და ეკონომიკის მინისტრი დავით ბალაძე ესწრებოდნენ. მთავრობის წარმომადგენლებმა მოგვიანებით ბიზნეს კლასის აპარტოტელი Palma Business Residences" დაათვალიერეს. 11.500 მ2 ფართობზე მდებარე აპარტ-ოტელი ბიზნეს კლასის 51 საცხოვრებელი რეზიდენციისგან შედგება.
მთავრობის პირველი პირები გასართობ კომპლექს "Palma Laguna"-ს გაეცნენ. 8.500 მ2 ფართობზე განლაგებული ღია საცურაო აუზი პირველია ბათუმში, რომელიც ზღვის წყლით მარაგდება. აუზი მოიცავს პავილიონს, დახურულ გალერეას, რეგისტრატურას, მოსასვენებელს და გასარუჯ ზონებს, როგორც აუზის ირგვლივ, ისე პავილიონის ღია ტერასებზე, ბარს ღია საცურაო აუზში და ბარს ტერასაზე, კვების ბლოკს, ევკალიპტებისა და პალმების რეკრეაციულ "მწვანე" ზონას.
მთელი პროექტი მაღალი დონის სასტუმროს, 2 საცხოვრებელ კომპლექსს, მულტიფლექსს, გასართობ ცენტრს და კაზინოს აერთიანებს. ამ ეტაპზე პროექტში უკვე 60 მლნ ლარია დახარჯული, ახალი სასტუმრო კომპლექსის ექსპლუატაციაში შესვლისას ეს თანხა 100 მილიონამდე გაიზრდება.პროექტში ჯამში 500 ადამიანი დასაქმდება. სასტუმრო ექსპლუატაციაში 2016 წელს შევა.
