ენერგეტიკის მინისტრის კახა კალაძის განცხადებით, ეროვნული ბანკთან დაკავშირებით დარჩენილია კიდევ ოთხი შენიშვნა, რომელიც აუცილებლად იქნება გათვალისწინებული. როგორც მან მთავრობის დღევანდელი სხდომის დასრულების შემდეგ ჟურნალისტებთან განაცხადა, ბოლო პერიოდში სებ-თან დაკავშირებით, პოლიტიკურად მოტივირებული განცხადებები კეთდებოდა.
„ეროვნულ ბანკთან დაკავშირებით ბოლო დღეებში გაკეთებული განცხადებებიდან აშკარად ჩანს, რომ ეს განცხადებები პოლიტიკურად მოტივირებულია. ჩვენ რამდენიმე ხნის წინ ვისმენდით პრეზიდენტის ადმინისტრაციის მხრიდან, ასევე „ნაციონალური მოძრაობის“ მხრიდან, რომ ამ კანონპროექტის ალტერნატივას წარმოადგენდნენ, თუმცა არაფერი არ არის პარლამენტში წარმოდგენილი. პრემიერი შეხვდა გუშინ ბატონ სადიკოვს და ის შენიშვნები, რომლებიც განვიხილეთ და შეჯერებული იყო. ამის შემდეგ, არის კიდევ ოთხი შენიშვნა, რომელსაც აუცილებლად გავითვალისწინებთ, ვიმუშავებთ და ვფიქრობ, ყველასთვის მისაღები იქნება ეს კანონპროექტი. აქ მთავარია, რომ ჩვენ ძალიან მშვიდად, ფაქიზად მოვეკიდოთ ამ თემას, რადგან საქმე ეხება ბიზნესის სექტორს და მნიშვნელოვანია სიმშვიდე“, - განაცხადა კახა კალაძემ.
