აზიის განვითარების ბანკის, რეგიონული განვითარებისა და ინფრასტრუქტურის სამინისტროს, მუნიციპალური განვითარების ფონდის წარმომადგენლები და თბილისის მერი დღეს დედაქალაქის მეტროს ქსელის გაფართოებისა და ახალი სადგურის მშენებლობის დაწყების ცერემონიას დაესწრნენ.
პროექტის ფარგლებში მოხდება „ვაჟა-ფშაველასა“ და „უნივერსიტეტის“ სადგურებს შორის არსებული გვირაბის რეაბილიტაციადა ახალი სადგურის გახსნა. პროექტი აზიის განვითარების ბანკის მდგრადი ურბანული ტრანსპორტის საინვესტიციო პროგრამის ფარგლებში ფინანსდება.
„პროექტი გააუმჯობესებს ურბანული სატრანსპორტო ქსელის ეფექტურობას და საიმედოობას, შექმნის ეკონომიკურ შესაძლებლობებს და სამუშაო ადგილებს და ხელს შეუწყობს უფრო მდგრად გარემოს თბილისში,“ ამბობს ქეითი ჯულიანი, აზიის განვითარების ბანკის მუდმივი წარმომადგენლობის დირექტორი.
ეფექტური და მდგრადი სატრანსპორტო ქსელის შექმნა საქართველოს შემდგომი ურბანული განვითარების ძირითად კომპონენტს წარმოადგენს. საქართველოს მთავრობა და დონორი ორგანიზაციები მუშაობენ სისტემაზე, რომელიც უზრუნველყოფს მოსახლეობის საჭიროებათა დაკმაყოფილებას და ცხოვრების დონის გაუმჯობესებას.
„მეტროს ხაზი 2-ის ახალი შტოს დასრულება გაზრდის მობილურობას და შეამცირებს დატვირთვას საგზაო ქსელზე. ეს პროცესი ასევე მოგვიტანს უძრავ ქონებასა და მდგრად ურბანულ განვითარებასთან დაკავშირებულ აშკარა სარგებელს“, - განაცხადა ბერტრან გოალუმ, ურბანული განვითარების მთავარმა სპეციალისტმა აზიის განვითარების ბანკიდან.
აზიის განვითარების ბანკისაქართველოს მხარდაჭერას 2007 წლიდან ახორციელებს. 2014 წლის ბოლოსთვის აზიის განვითარების ბანკის მიერ საქართველოსთვის დამტკიცებულმა დახმარებამ 1.6 მილიარდ აშშ დოლარს გადააჭარბა საიდანაც 259 მილიონი აშშ დოლარი 2014 წელს დამტკიცებული სესხები და ტექნიკური დახმარების გრანტებია.
აზიის განვითარების ბანკი, რომლის სათავო ოფისი მანილაში, ფილიპინებზე მდებარეობს, მიზნად ისახავს აზიისა და წყნარი ოკეანის რეგიონში სიღარიბის დონის შემცირებას ეკონომიკური ზრდის, გარემოსდაცვითი ღონისძიებების და რეგიონული ინტეგრაციის გზით. დაარსდა რა 1966 წელს, ბანკი აერთიანებს 67 წევრ ქვეყანას, საიდანაც 48 აღნიშნულ რეგიონს წარმოადგენს. 2014 წლის მდგომარეობით აზიის განვითარების ბანკის დახმარებამ 22.9 მილიარდი აშშ დოლარი შეადგინა, 9.2 მილიარდი აშშ დოლარი თანადაფინანსების ჩათვლით.
