საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ22 ივლისის საჯარო სხდომაზე შპს „ჯიფაუერის“, შპს „მტკვარი ენერგეტიკას“, შპს „საქართველოს საერთაშორისო ენერგეტიკული კორპორაციის“ ელექტროენერგიის წარმოების ტარიფების კორექტირების შესახებ იმსჯელა. კომისიის გადაწყვეტილებით, შპს „ჯიფაუერისთვის“ განისაზღვრა 7.534 თეთრით კვტ/სთ; შპს „მტკვარი ენერგეტიკასთვის“ 10.871თეთრით კვტ/სთ; შპს „საქართველოს საერთაშორისო ენერგეტიკული კორპორაციისათვის“ – 10.194 თეთრით კვტ.სთ. ტარიფების მოქმედების ვადაა 2015 წლის პირველი აგვისტოდან 2015 წლის 31 დეკემბრის ჩათვლით.
ტარიფები წარმოდგენილია დღგ-ს გარეშე.
2015 წლის აპრილში კომპანიებმა კომისიაში წარმოადგინეს წერილობითი მოთხოვნები ელექტროენერგიის წარმოების ტარიფების კორექტირების თაობაზე, რაზეც კომისიაში დაიწყო საჯარო ადმინისტრაციული წარმოებები. ინფორმაცია განთავსდა როგორც კომისიის ვებ გვერდსა და Facebook-ის, ასევე გავრცელდა მედიაში. საჯარო წარმოების დაწყების შესახებ ინფორმაციასთან ერთად, კომისიის ვებ-გვერდზე განთავსდა შესაბამისი პროექტები და განისაზღვრა საკითხთან დაკავშირებით დაინტერესებული პირების მიერ (ნებისმიერი ფიზიკური პირი) კომისიაში წინადადებების წარმოდგენის ვადა. თუმცა, წინადადებები წარმოდგენილი არ ყოფილა.
კომპანიების მიერ წარმოდგენილი ინფორმაციისა დაგანმარტებების მიხედვით, აშშ დოლართან მიმართებაში ეროვნული ვალუტის გაცვლითი კურსისცვლილებიდან გამომდინარე, ელექტროენერგიის წარმოების მიზნით შესასყიდი ბუნებრივი აირის ფაქტობრივი ფასი მნიშვნელოვნად განსხვავდებოდა დაგეგმილი ფასისგან.
კომისიის ტარიფებისა და ეკონომიკური ანალიზის დეპარტამენტის მიერ22 ივლისის საჯაროსხდომაზე წარმოდგენილი გაანგარიშებებისმიხედვით, ტარიფების ცვლილების მნიშვნელოვანი ნაწილი მოდის ვალუტის გაცვლით კურსზე. კერძოდ, საანგარიშო პერიოდისთვის ვალუტის გაცვლითი კურსის (USD/GEL) ზრდამ,საშუალოდ 25% შეადგინა.ბუნებრივიგაზის ფასი განსაზღვრულია აშშ დოლარში, ხოლო ანგარიშსწორება ხდება ეროვნულ ვალუტაში.
კომისიის 2014 წლის 18 დეკემბრის #32 დადგენილების შესაბამისად, შპს „ჯიფაუერისათვის“ შესასყიდი ბუნებრივი გაზის ფასის გაცვლითი სავალუტო კურსი განსაზღვრული იყო 1.7851 ლარით აშშ დოლართან მიმართებაში; კომისიის 2014 წლის 21 აგვისტოს #19 დადგენილებით - შპს „მტკვარი ენერგეტიკასთვის“ - 1.7521 ლარით აშშ დოლართან მიმართებაში; კომისიის 2014 წლის 21 აგვისტოს #20 დადგენილებით - შპს „საქართველოს საერთაშორისო ენერგეტიკული კორპორაციისათვის“ - 1.7623 ლარით აშშ დოლართან მიმართებაში. ვალუტის გაცვლითი კურსიდან მიღებულმა სხვაობამ შპს „ჯიფაუერისთვის“ შეადგინა 214 291 ლარი, შპს „მტკვარი ენერგეტიკისთვის“ – 16 747 489 ლარი, შპს „საქართველოს საერთაშორისო ენერგეტიკული კორპორაციისათვის“ –
11 291 794 ლარი, რაც მოქმედი სატარიფო მეთოდოლოგიის თანახმად ექვემდებარება კორექტირებას.
22 ივლისის საჯარო სხდომაზე მიღებული გადაწყვეტილებების შესაბამისად, შპს „ჯიფაუერისთვის“, შპს „მტკვარი ენერგეტიკასთვის“, შპს „საქართველოს საერთაშორისო ენერგეტიკული კორპორაციისათვის“ელექტროენერგიის წარმოების მოქმედ ტარიფში, შესასყიდი ბუნებრივი გაზის ფასის გაცვლითი სავალუტო კურსი განისაზღვრა 2.3000 -ით, „საქართველოს 2015 წლის სახელმწიფო ბიუჯეტის შესახებ“ საქართველოს კანონში ცვლილების შეტანის თაობაზე“ მიმდინარეწლის 17 ივლისს დამტკიცებული კანონის მიხედვით.
