მერია ,,პანორამა თბილისის” პროექტში არ მონაწილეობს, მას მხოლოდ საზედამხედველო ფუნქცია ექნება, - ამის შესახებ თბილისის მერის მოადგილემ ნინა ხატისკახმა ჟურნალისტებთან განაცხადა. მისი განმარტებით, მე-5 კატეგორიის პროექტები ეკონომიკის სამინისტროში მტკიცდება.
"მერია ამ პროცესში არ მონაწილეობს, როგორც თქვენც მოგეხსენებათ, მე-5 კატეგორიის პროექტები ეკონომიკის სამინისტროში მტკიცდება. ეს ნიშნავს იმას, რომ პროექტი შეთანხმებულია ეკონომიკის სამინისტროში. ამ შემთხვევაში მერიას მხოლოდ საზედამხედველო ფუნქცია ექნება მშენებლობის პერიოდში. რაც შეეხება ნებართვას და თავად პროექტის შეთანხმებას მერიასთან, ასეთი რამე არ მომხდარა, ეს მოხდა ეკონომიკის სამინისტროში", - განაცხადა ხატისკაცმა.
რაც შეეხება საკითხს ნებართვის გაცემას, დოკუმენტების წარდგენამდე, ხატისკაცი აცხადებს, რომ ამის შესახებ ინფორმაციას არ ფლობს.
შეგახსენებთ, ეკონომიკის სამინისტრომ გუშინ გაავრცელა განცხადება, რომ ტექნიკური და სამშენებლო ზედამხედველობის სააგენტომ პროექტ "პანორამა თბილისთან" დაკავშირებით მშენებლობის სამი ნებართვა გასცა. კერძოდ, პირველი ობიექტზე - ყოფილი "ცეკავშირის" შენობის ტერიტორიაზე, სადაც მრავალფუნქციური სასტუმრო კომპლექსი შენდება - ნებართვა 2015 წლის 20 აპრილს გაიცა; მეორე ობიექტზე - სოლოლაკის ბაღებზე - 2015 წლის 18 მაისს; ხოლო მესამე ობიექტზე - სოლოლაკის მაღლობზე, სადაც მრავალფუნქციური სასტუმრო კომპლექსი უნდა აშენდეს _ 2015 წლის 8 ივნისს.
თანაინვესტირების ფონდის აღმასრულებელი დირექტორის გიორგი ბაჩიაშვილის განცხადებით, "პანორამა თბილისის" მმართველი გუნდი პროექტის განხორციელებაზე მუშაობს და თავისუფლების მოედანზე გარკვეული სამუშაოები უკვე მიმდინარეობს.
