პრემიერ-მინისტრის მიერ ინიცირებული პროგრამის ფარგლებში „აწარმოე საქართველოში“, მიკრო და მცირე მეწარმეობის ხელშეწყობის პროექტის განხორციელება გრძელდება და 2015 წლის 29 ივნისიდან ქვეყნის მასშტაბით დარჩენილ რეგიონებს კახეთს, მცხეთა-მთიანეთს, შიდა ქართლს, სამეგრელო-ზემო სვანეთს, გურიასა და აჭარას დაფარავს.
10 ივლისიდან 11 ივლისის ჩათვლით, აღნიშნული პროგრამის ადგილობრივი მოსახლეობისათვის გაცნობის მიზნით, მეწარმეობის განვითარების სააგენტოს ორგანიზებით დაგეგმილია საინფორმაციო სახის შეხვედრები სამეგრელო-ზემო სვანეთში, გურიისა და აჭარის რეგიონებში.
შეხვედრებში მონაწილეობას მიიღებენ მეწარმეობის განვითარების სააგენტოს დირექტორი, გიორგი ციკოლია, საქართველოს ეკონომიკისა და მდგრადი განვითარების მინისტრის მოადგილე ქეთევან ბოჭორიშვილი და რეგიონებში პროგრამის უშუალო განმახორციელებელი ორგანიზაციის წარმომადგენლები. შეხვედრები გაიმართება მოკლე პრეზენტაციისა და კითხვა პასუხის ფორმატით, შესაბამისად, ნებისმიერ დაინტერესებულ პირს ექნება შესაძლებლობა უშუალოდ პროგრამის ინიციატორებისა და მასში მონაწილე პირებისგან მიიღოს ამომწურავი ინფორმაცია და ჩაერთოს ახალ სამთავრობო ინიციატივაში.
ხაზგასასმელია, რომ კახეთში, მცხეთა-მთიანეთში, შიდა ქართლში, სამეგრელო-ზემო სვანეთში, გურიასა და აჭარაში მიკრო და მცირე მეწარმეობის ხელშეწყობის პროგრამის განხორციელება 2015 წლის 29 ივნისიდან დაიწყო, 3 აგვისტოს კი ბიზნეს იდეების კონკურსის პირველი ეტაპი დასრულდება, რომელიც შერჩეული ბიზნეს იდეის განხორციელებაში ჩართული მეწარმე სუბიექტის 5000 ლარის ოდენობით (მეწარმეთა ორ კაციანი ჯგუფის შემთხვევაში 10 000 ლარი, ხოლო სამ კაციანი ჯგუფის არსებობის შემთხვევაში კი 15 000 ლარის ოდენობით) თანადაფინანსებას გულისხმობს. განაცხადების მიღება www.qartuli.ge ვებ გვერდის მეშვეობით არის შესაძლებელი და კონკურსში ჩართვის შესაძლებლობა ნებისმიერ საქართველოს მოქალაქეს აქვს, რომელსაც არ გააჩნია სახელმწიფოს მიმართ ვადაგადაცილებული დავალიანება, არის ფიქსირებული გადასახადის გადამხდელი პირი ან მიკრო და მცირე ბიზნესის სტატუსის მქონე მეწარმე. პროგრამის განსახორციელებლად ცენტრალური ბიუჯეტიდან გამოიყო 20 000 000 ლარი, ფინანსური მხარდაჭერის ხანგრძლივობის ვადად კი 26 თვე განისაზღვრა.
საინფორმაციო სახის შეხვედრების განრიგი:10 ივლისი 2015 წელი11:00 საათი - აბაშა, გამგეობის შენობა, დარასელიას №1 12:00 საათი - ბათუმი (მოწვეულია ხელვაჩაური) - ქ. ბათუმის მუნიციპალიტეტის მერია, ლ. ასათიანის №25.
13:00 საათი - სენაკი (მოწვეულია მარტვილი), გამგეობის შენობა -ჭავჭავაძის №103
13:00 საათი - ფოთი, 9 აპრილის ხეივანი №15
17:00 საათი - ზუგდიდი (მოწვეულია წალენჯიხა, ჩხოროწყუ, ხობი) - შოთა მესხიას სახ. უნივერსიტეტის მე-2 სართული, ჯანაშიას №14
11 ივლისი 2015 წელი
12:00 საათი - ქობულეთი, დ. აღმაშენებლის №114, კულტურის სახლის შენობა
12:00 საათი - ქედა, გამგეობის შენობა, კოსტავას №3
13:00 საათი - მესტია, სეტის მოედანი №1, გამგეობის შენობა
15:00 საათი - შუახევი (მოწვეულია ხულო), გამგეობის შენობა
15:00 საათი - ოზურგეთი (მოწვეულია ლანჩხუთი, ჩოხატაური) - ქ. ოზურგეთი, კოსტავას ქ. №1. ადმინისტრაციული შენობის მე-3 სართული.
