საქართველოს თავდაცვის მინისტრი ჯარში სუიციდის და თვითდაზიანების მიზეზების მეცნიერულ შესწავლას გეგმავს. თინა ხიდაშელმა მეცნიერებათა აკადემიაში, მეცნიერებთან შეხვედრაზე განაცხადა, რომ ქართულ ჯარში სუიციდის შემთხვევების რაოდენობა საგანგაშოა.
,,ეს არის ძალიან მტკივნეული თემა, რომელსაც სჭირდება მეცნიერული კვლევა. ჩემთვის მნიშვნელოვანია ბრძოლა ფსიქოლოგიურ ტრავმასთან, რომლის მსხვერპლიც შემდეგ ხდება ჯარისკაცი და რომელმაც შეიძლება თვითმკვლელობით დაასრულოს სიცოცხლე ამ ტრავმის გამო. ძალიან მაღალი გვაქვს სუიციდის რაოდენობა ჯარში. ასევე ძალიან მაღალია თვითდაზიანებების რაოდენობაც. ამას სჭირდება მეცნიერული კვლევა თუ რატომ ხდება ეს, რატომ მიდიან ადამიანები აქამდე, რომლებიც სინამდვილეში ყველაზე უფრო მეტად უნდა იყვნენ მიმართული ასეთი ქმედებების წინააღმდეგ", - განაცხადა ხიდაშელმა.
საქართველოს თავდაცვის მინისტრმა მეცნიერებათა აკადემიაში შეხვედრა მოადგილეებთან და შეიარაღებული ძალების გაერთიანებული შტაბის უფროს ვახტანგ კაპანაძესთან ერთად გამართა.
