აჭარის 2015 წლის ნაერთი ბიუჯეტის ექვსი თვის გეგმა 24 პროცენტიანი გადაჭარბებით შესრულდა. აჭარის ფინანსთა და ეკონომიკის სამინისტროს ინფორმაციით, იანვარ-ივნისის ნაერთი ბიუჯეტის გეგმა 98 მლნ 328 ათას 500 ლარი იყო, თუმცა საბოლოდ შესრულებამ 121 მლნ 866 ათას 600 ლარი შეადგინა. იანვარ-ივნისის მდგომარეობით, ნაერთი ბიუჯეტის შემოსავლების მუხლი 122 %-ით შესრულდა, სხვა შემოსავლების მუხლი - 127,1 %-ით, ხოლო არაფინანსური აქტივების (კლება) შესრულებამ საანგარიშო პერიოდში 141,3 %-ს მიაღწია.

რაც შეეხება აჭარის რესპუბლიკური ბიუჯეტის იანვარ-ივნისის მონაცემებს, ის 29 %-იანი გადაჭარბებითაა შესრულებული.

აჭარის ფინანსთა და ეკონომიკის სამინისტროში აცხადებენ, რომ რესპუბლიკური ბიუჯეტის გეგმა 67 მლნ 973 ათას 300 ლარი იყო, თუმცა გეგმა 129,4 %-ით შესრულდა და ბიუჯეტში აკუმულირებულმა თანხამ 87 მლნ 923 ათას 500 ლარი შეადგინა.

სტატისტიკური მონაცემების მიხედვით, იანვარ-ივნისის რესპუბლიკური ბიუჯეტის შემოსავლების მუხლი - 126,2 %-ით, სხვა შემოსავლების მუხლი - 184,5 %-ით, ხოლო არაფინანსური აქტივების (კლება) მუხლი 140,6 %-ით შესრულდა.

აჭარის ფინანსთა და ეკონომიკის სამინისტროში აცხადებენ, რომ იანვარ-ივნისში ბათუმის თვითმმართვეული ერთეულის ბიუჯეტი 107,8-ით შესრულდა, რაც შეეხება მუნიციპალიტეტებს სურათი ასეთია: ქობულეთის მუნიციპალური ბიუჯეტი - 167,5 %-ით, ხელვაჩაურის მუნიციპალური ბიუჯეტი - 112,7 %-ით, შუახევის მუნიციპალური ბიუჯეტი - 152,7 %-ით, ხულოს მუნიციპალური ბიუჯეტი - 195,1 %-ით, ხოლო  ქედას ბიუჯეტი  45 %-ით შესრულდა.