3 ივლისის მთავრობის სხდომაზე, „აწარმოე საქართველოში“ სახელმწიფო პროგრამის ფარგლებში, კიდევ ერთი საწარმოს პროექტი დამტკიცდა. როგორც სხდომის დასრულების შემდეგ ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა ჟურნალისტებს განუცხადა, მთავრობის განკარგულებით, შპს „გლობალ თრეიდს“ პროგრამის ფარგლებში სიმბოლურ ფასად - 1 ლარად საკუთრებაში გადაეცემა ქობულეთში მდებარე არასასოფლო-სამეურნეო დანიშნულების მიწის ნაკვეთი, სადაც თხილის გადამამუშავებელი საწარმო შეიქმნება. 1 ლარად გადაცემული მიწის ნაკვეთის საბაზრო ღირებულება 207 918 ლარია.
სანაცვლოდ კომპანია „გლობალ თრეიდი“ სახელმწიფოს წინაშე ვალდებულებას იღებს, რომ გადაცემულ ქონებაზე წარმოებას 2 წლის ვადაში დაიწყებს, რისთვისაც 831 672 ლარის ინვესტიციას განახორციელებს. კომპანია გადამუშავებული თხილის წლიური მოცულობის გაზრდას 5 000 ტონამდე გეგმავს. წარმოებაში დაახლოებით 60 ადამიანი დასაქმდება.
კომპანიის წარმომადგენლების განცხადებით, გადამუშავებული თხილის ექსპორტი გერმანიაში, ავსტრიაში, ესპანეთსა და ევროპის სხვა ქვეყნებში განხორციელდება.
