„მთავრობის სხდომაზე გავიტანეთ სამთო-სათხილამურო კურორტების განვითარების პაკეტი, სადაც კომპანია „დოპელ მაიერი“ ბაკურიანში განახორციელებს კოხტის ტრადიციული ტრასის აღდგენას, ასევე გაშენდება თანამედროვე ალპური ტიპის დასახლება“ - ამის შესახებ საქართველოს ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა დღევანდელი მთავრობის სხდომის დასრულების შემდეგ ჟურნალისტებს განუცხადა.
„პარტნიორობას გვიწევს ერთ-ერთი კომპანია, რომელიც თავის მხრივ, იღებს ვალდებულებას, რომ გაინაწილოს საბაგირო გზის დამონტაჟების ხარჯები. 500 საწოლზე გათვლილი ინფრასტრუქტურა აშენდება თავად კოხტის ძირში, ხოლო მიტარბის მხარეს შეიქმნება 300 დამატებითი საწოლი და ეს არის ძალიან კარგი ბაკურიანის კურორტისთვის“ - აღნიშნა ვიცე-პრემიერმა. მისი თქმით, ბაკურიანში ასევე დამონტაჟდება მთის ციგების ახალი ატრაქციები, ხოლო გუდაურის მიმართულებით მასტერპლანინგის დაწყება იგეგმება. „ეს ნიშნავს, რომ გუდაურისთვის შედგება თანამედროვე ტიპის კურორტის განვითარების გეგმა, თავისი საკურორტო რეგულაციებით და ასე შემდეგ. ეს კარგია იმისთვის, რომ კვალიფიციური ინვესტორები მოვიზიდოთ ჩვენს სამთო კურორტებზე, რათა უძრავი ქონების ღირებულება გაიზარდოს და ეს იყოს ძალიან საინტერესო მიმართულება“ - განაცხადა გიორგი კვირიკაშვილმა.
