მოსკოვი-ბათუმისა და სანკტ პეტერბურგი-თბილისის მიმართულებით რეგულარული რეისების შესრულებას ”ურალის ავიახაზები” იწყებს.
სამოქალაქო ავიაციის სააგენტოს ინფორმაციით, მიმდინარე წლის 7 ივლისიდან, ავიაკომპანია ”ურალის ავიახაზები” მოსკოვიდან ბათუმის მიმართულებით პირდაპირი რეგულარული საჰაერო მიმოსვლის შესრულებას იწყებს. თავდაპირველად მოსკოვი-ბათუმის მიმართულებით ავიაკომპანია რეისებს კვირაში 1 სიხშირით შეასრულებს, ხოლო 20 ივლისიდან კი კიდევ ერთ სიხშირეს დაამატებს.
13 ივლისიდან კი ”ურალის ავიახაზები” სანკტ პეტერბურგი-თბილისის მიმართულებას შესთავაზებს მგზავრებს. ფრენები კვირაში ერთხელ შესრულდება.
ავიაკომპანიამ შესაბამისი ნებართვები საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოსგან უკვე მიიღო.
