ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის მოწვევით საქართველოში ტურიზმის სტატისტიკის საერთაშორისო ექსპერტი და ავსტრიის სტატისტიკური ოფისის დირექტორის მოადგილე პიტერ ლაიმერი იმყოფება. პიტერ ლაიმერმა ტურიზმის ეროვნულ ადმინისტრაციაში თანამშრომლებს სტატისტიკის სფეროში გამოცდილება გაუზიარა და ადმინისტრაციის ხელმძღვანელთან გიორგი ჩოგოვაძესთან სამომავლო თანამშრომლობის საკითხები განიხილა. ექსპერტმა დადებითად შეაფასა საქართველოში ჩატარებული სამუშაოები, რომელიც ტურიზმის დარგში სტატისტიკური მონაცემების დახვეწას გულისხმობს. აღსანიშნავია, რომ საქართველოში ჩატარებული საერთაშორისო და შიდა ვიზიტორების კვლევები მსოფლიო ტურიზმის ორგანიზაციის რეკომედაციებთან შესაბამისობაშია. პროექტი ორგანიზაცია „GIZ”-ის დაფინანსებით ხორციელდება.
