ეკონომიკის მინისტრმა გიორგი კვირიკაშვილმა 2,1% მაისის წინასწარი ეკონომიკის ზრდის მაჩვენებელი შეაფასა. როგორც მინისტრმა „2030“-ის ეთერში განაცხადა, „ყველაფერი იდეალურად არ არის, თუმცა კარგია, რომ ამ მოვლენების ფონზე რეალური ზრდა არსებობს“.
„გამოქვეყნდა მაისის წინასწარი ეკონომიკური ზრდის მაჩვენებელი - 2,1%. პირველი კვარტალი იყო 3,2%, საშუალო წლიურმა ზრდამ 5 თვის განმავლობაში შეადგინა 2,5%. მაისის თვეში განსაკუთრებული ზრდით გამოირჩეოდა მშენებლობის სექტორი, ფინანსური შუამავლობის სექტორი, ელექტროენერგეტიკა და უძრავი ქონება“, - განაცხადა გიორგი კვირირკაშვილმა.
ამასთანავე მინისტრმა უძრავი ქონების სფეროს ზრდის მაჩვენებელზე გაამახვილა ყურადღება და აღნიშნა, რომ 5% ზრდა ამ სექტორში განსაკუთრებით პოზიტიურია, რადგანაც „სუფთა კერძო სექტორში დადებული გარიგებები განსაკუთრებით გვიჩვენებს გაჯანსაღების ტენდენციას“.
გარდა ამისა, გიორგი კვირიკაშვილმა დაასახელა სექტორებიც, სადაც კლება აღენიშნება: ავტომობილებით ვაჭრობა, მეტალურგია და ა.შ.
