30 ივნისს, საქართველოს დამსაქმებელთა ასოციაციისა და მისი პარტნიორი კომპანიების წარმომადგენლები სსიპ საქართველოს მეწარმეობის განვითარების სააგენტოს ხელმძღვანელს გიორგი ციკოლიას შეხვდებიან.
დამსაქმებელთა ასოციაციის ინფორმაციით, აღნიშნული შეხვედრა მიზნად ისახავს მეწარმეებისთვის სააგენტოს პროექტთან დაკავშირებით ინფორმაციის მიწოდებას, რათა მოხდეს ბიზნესსექტორის მაქსიმალური ჩართულობა მიმდინარე პროექტებში, რაც მათ ბიზნესის განვითარების შესაძლებლობას მისცემს.
სახელმწიფო პროგრამის „აწარმოე საქართველოში“ მიზანია საქართველოში მეწარმეობის განვითარება, მეწარმე-სუბიექტების მხარდაჭერა, ახალი საწარმოების შექმნის ხელშეწყობა და კერძო სექტორის კონკურენტუნარიანობისა და საექსპორტო პოტენციალის ზრდა ფინანსებზე, უძრავ ქონებასა და თანამედროვე ტექნოლოგიებზე ხელმისაწვდომობისა და ტექნიკური დახმარების საშუალებით.
შეხვედრას სსიპ საქართველოს მეწარმეობის განვითარების სააგენტოს მხრიდან დაესწრება მეწარმეობის განვითარების სააგენტოს დირექტორი, გიორგი ციკოლია, რომლის მიერ გაკეთდება პრეზენტაცია, თემაზე: მეწარმეობის განვითარების სააგენტო: შედეგები, მიმდინარე და დაგეგმილი პროექტები.
