ბანკი „რესპუბლიკა“ განაგრძობს ახალგაზრდა ტალანტების ხელშეწყობას და ფრანგულ-ქართული კულტურული კავშირების გაღრმავებას. ამჯერად, ბანკის მხარდაჭერით, ქართულ საზოგადოებას საკუთარ შემოქმედებას წარუდგენს ფოტოხელოვანი ანა გოგუაძე. გამოფენა სახელწოდებით “ანას პარიზი აპრილში“ დღეს დიდუბეში, გამოფენის მიმდებარე ტერიტორიაზე, კაფე „ტერასას“ ღია სივრცეში გაიხსნება.
პროექტის მოსამზადებლად ავტორი აპრილში პარიზში იმყოფებოდა, სადაც პირველად შექმნა ფოტოების შავ-თეთრი სერია. გამოფენაზე, ღია ცის ქვეშ, ფრანგული მუსიკის თანხლებით, წარმოდგენილი იქნება ოცდახუთი ფოტო. ეს ანას პირველი ნამუშევარია დოკუმენტურ ჟანრში. მისი მთავარი გმირები ჩვეულებრივი ადამიანები არიან, რომლებიც თანამედროვე, ყოველდღიურ, თავისუფალ პარიზს ქმნიან.
„ბანკი „რესპუბლიკა“, თავისი სოციალური პასუხისმგებლობის პოლიტიკის ფარგლებში, სიამოვნებით განაგრძობს ახალგაზრდა ხელოვანების მხარდაჭერას. დღეს გამოფენის სტუმრებს სიამოვნებით წარვუდგენთ ნიჭიერი ფოტოხელოვანის, ანა გოგუაძის გამოფენას. მას ორიგინალური არტისტული ხედვა აქვს და პარიზს საინტერესო კუთხით წარმოაჩენს. ვფიქრობთ, ეს მნიშვნელოვანი პროექტი კარგი ილუსტრაციაა იმისა, რომ ტალანტისთვის არ არსებობს არავითარი ბარიერი. ფოტოგრაფია ისევე, როგორც მუსიკა, უნივერსალური ენაა, რომელიც კულტურათა დიალოგის მნიშვნელოვანი ნაწილია. მოხარული ვართ და გვეამაყება ანასთან მეგობრობა”, განაცხადა ბანკ „რესპუბლიკის“ კორპორაციული კომუნიკაციის დეპარტამენტის უფროსმა თეიკო კანდელაკმა.
რაც შეეხება თავად ანა გოგუაძეს. გამოფენა ავტორის მეხუთე ფოტო პროექტია. ანა არაერთი მნიშვნელოვანი პროექტის ინიციატორია. ხუთი პერსონალური გამოფენის ავტორს სხვადასხვა სოციალური პროექტი აქვს განხორციელებული. გარდა ამისა, აქვს სხვადასხვა ფოტოკონკურსის დიპლომი, ოთხი საპრიზო ადგილით. არის „მზიურის“ „მზის ფესტივალის“ იდეის ავტორი და ორგანიზატორი.
