ბათუმის მერიამ საზოგადოების აზრი გაითვალისწინა და გარემოვაჭრეებისათვის განკუთვნილი ჯიხურები, ძველ ადგილზე დააბრუნა. როგორც ბათუმის მერი გიორგი ერმაკოვი აცხადებს, მერიამ გაითვალისწინა გარემოვაჭრეების მდგომარეობა და მიღო გადაწყვეტილება, რომლის საფუძველზეც ჯიხურები ძველ ტერიტორიაზე დააბრუნეს, სადაც მოვაჭრეებს მიეცემათ საშუალება, ტურისტული სეზონის განმავლობაში გააგრძელონ სამეწარმეო საქმიანობა.
”მოგეხსენებათ რამდენად მნიშვნელოვანია, ტურისტულ სეზონს ქალაქი მომზადებული შეხვდეს. იმისთვის, რომ ქალაქის ცენტრი გათავისუფლებულიყო ქაოტურად მიმოფანტული უსახური ჯიხურებისგან, გადაწყდა, მათი ერთად განთავსება, რასაც გარე მოვაჭრეებისა და საზოგადოების არცთუ ისე დადებითი შეფასება მოყვა. ჩვენთვის მნიშვნელოვანია ბათუმელებისა და საზოგადოების აზრი. გავითვალისწინეთ გარე მოვაჭრეების მდგომარეობა, რომ მათ გააჩნიათ იპოთეკური სესხები, არიან სოციალურად დაუცველები, მივიღეთ გადაწყვეტილება და წავედით კომპრომისზე რომ, გარემოვაჭრეები დროებით დავაბრუნოთ ძველ ტერიტორიაზე, სადაც მათ მიეცემათ საშუალება, ტურისტული სეზონის განმავლობაში გააგრძელონ სამეწარმეო საქმიანობა.
უნდა აღინიშნოს, რომ ეს ერთ-ერთი ის პრობლემაა, რომელიც წინა ხელისუფლებამ დაგვიტოვა და ვერ შეძლო ამის გადაწყვეტა. ახლა კი ჩვენ გვიხდება ამ ყველაფრის მოგვარება. გვინდა საბოლოოდ ისეთი გადაწყვეტილება მივიღოთ, რომელიც ჩვენი ქალაქისა და ბათუმელების ინტერესებს გაითვალისწინებს”, აღნიშნა ბათუმის მერმა.
შეგახსენებთ, რომ ბათუმის მერიამ 25 ივნისს, ჭაჭის თაუერის მიმდებარე ტერიტორიაზე ჯიხურები განათავსა, რომელიც მანამდე ბათუმის საბაგიროსთან იყო და ძირითადად სუვენირებით ვაჭრობა ხდებოდა.
აღნიშნული ფაქტი მერიამ ახსნა იმით, რომ ჯიხურები ქალაქში უკანონოდ იყო განთავსებული და მათი ერთ სივრცეში თავმოყრა პრობლემას მოაგვარებდა, რადგანაც მერია სპეციალურად გამოყოფილ ადგილზე, 2016 წლისთვის ძველ ჯიხურებს თანამედროვე დიზაინის ჯიხურებით ჩაანაცვლებდა.
ფაქტმა საზოგადოების და თავად გარემოვაჭრეების აღშფოთება გამოიწვია და ქუთაისში პარლამენტის შენობასთან გარემოვაჭრეების აქციაც გაიმართა.
