ახალგაზრდა იურისტთა ასოციაციამ მუნიციპალური განვითარების ფონდს, რომელიც 2008 წლის აგვისტოს ომის შედეგად დენილებისთვის სახოვრებელი სახლების მშენებლობას და რეაბილიტაციას ახორციელებდა, დარღვევები აღმოუჩინა.
`მუნიციპალური განვითარების ფონდს დარღვეული აქვს `სახელმწიფო შესყიდვების შესახებ~ საქართველოს კანონის მე-9 მუხლით დადგენილი სახელმწიფო შესყიდვების დაგეგმვისა და მომზადების წესები. კერძოდ, ტენდერის შედეგად გაფორმებულ თითქმის ყველა ხელშეკრულებაში შემდგომ განხორციელებულია ცვლილებები. ეს ნათლად მეტყველებს, რომ შემსყიდველ ორგანიზაციას არ გააჩნია ზუსტი ინფორმაცია და დოკუმენტაცია შესასრულებელი სამუშაოების მოცულობების, სახეობებისა და საჭიროებების შესახებ. გარდა ამისა, კონკრეტულ შემთხვევებში კონტრაქტორებმა სრულად არ შეასრულეს ხელშეკრულებით გათვალისწინებული ვალდებულებები, მაგრამ მათ მთლიანად აუნაზღაურდათ ხელშეკრულებით გათვალისწინებული თანხები. როგორც დგინდება, მთელი რიგი შესყიდვის მომზადების ღონისძიებები და ხარჯები მგფ-მა განახორციელა კერძო საკუთრებაში არსებული შენობა - ნაგებობების მიმართ და არამიზნობრივად~, - განუცხადა კახეთის საინფორმაციო ცენტრს `ახალგაზრდა იურისტთა ასოციაციის~ იურისტმა თამარ კორძაიამ.
მუნიციპალური განვითარების ფონდის ინფორმაციით, ფონდის განმარტებას საზოგადოება თავის მართლებად აღიქვამს, რაც ფონდს საჭიროდ არ მიაჩნია. `თავი რომ ვიმართლოთ, საამისო არაფერი გვჭირს~, - აღნიშნა მგფ-ის წარმომადგენელმა.
ახალგაზრდა იურისტთა ასოციაციამ აგვისტოს ომის შედეგად დევნილთა საცხოვრებელი პირობებით უზრუნველყოფისათვის განხორციელებული ღონისძიებების მონიტორინგი ფონდ `ღია საზოგადოება - საქართველოს~ მიერ დაფუძნებული კოალიციის `გამჭვირვალე საერთაშორისო დახმარება საქართველოს~ პროექტის ფარგლებში ჩაატარა. კოალიცია მიზნად ფინანსური დახმარების გამჭვირვალობის ხელშეწყობას, მთავრობის ანგარიშვალდებულების ამაღლებას და სამოქალაქო საზოგადოების თანამონაწილეობის გაზრდას ისახავს.
