31 ხმით 3-ის წინააღმდეგ საკრებულომ ბიუჯეტის 44 მილიონიანი მატება დაამტკიცა. დეპუტატების კითხვებს ქალაქის მერის მოადგილე გიორგი ხელაია პასუხობდა.
ოპოზიციას კითხვები ოლიმპიადასთან დაკავშირებით ჰქონდა, რომლისთვისაც დამატებით კიდევ 13 მილიონი გამოიყოფა.
გაერთიანებული დემოკრატების წევრმა ზაზა ვეკუამ სხდომაზე განაცხადა, რომ ამ ღონისძიებისთვის თავდაპირველად წარმოდგენილი 28 მილიონი საბოლოოდ 90 მილიონამდე გაზარდა.
გიორგი ხელაიას განმარტებით, ეს ღონისძიება ნაციონალური მოძრაობის მიერ არასწორად იჱო დაგეგმილი და ფინანსური მხარდაჭერა არ ჰქონად.
"ეს ღონისძიება სრული ფინანსური მხარდაჭერის გარეშე იყო დაგეგმილი. ეს არის ნომერ პირველი პრობლემა. არსებული 153 მილიონიდან ჩვენამდე თანხები დახარჯული იყო. ახალი ხელისუფლების მოსვლის შემდეგ 100 მილიონი დაიხარჯა, დანარჩენი თანხები კი მანამდე იყო გახარჯული," - აცხადებს მერის მოადგილე, გიორგი ხელაია.
ნაციონალური მოძრაობის დეპუტატებისათვის ასევე გაუგებარია საგზაო ინფრასტრუქტურისთვის არსებული 18 მილიონიანი ვალის საკითხიც.
მათ ბიუჯეტში განათლებისა და კულტურის მიმართულებით შესული ცვლილებებიც გააპროტესტეს.
„მაშინ, როდესაც მთელი მერია და სახელმწიფო სტრუქტურები ცდილობენ, რომ სტიქიით დაზარალებულებისთვის თანხების მაქსიმალური მობილიზება მოახდინონ, რამ განაპირობა კულტურის ღონისძიებების ნახევარი მილიონით ზრდა?“ - განაცხადა ნაციონალური მოძრაობის დეპუტატმა, ირაკლი ნადირაძემ.
ნაციონალური მოძრაობის მხრიდან დასმულ კითხვას კულტურული ღონისძიებების ზრდის შესახებ საკრებულოს განათლებისა და კულტურის კომისიის თავმჯდომარემ თამარ ტალიაშვილმა "არასერიოზული" უწოდა და თქვა, რომ "თანხები არ იზრდება, უბრალოდ თანხების შიდა გადანაწილება მოხდა".
