19 ივნისს, საქართველოს პრეზიდენტი გლობალური უსაფრთხოების ფორუმში (GLOBSEC 2015) მიიღებს მონაწილეობას, რომლის ფარგლებშიც საქართველო-სლოვაკეთის ერთობლივ ბიზნეს ფორუმს გახსნის.
სლოვაკეთის ეკონომიკის სამინისტროსთან თანამშრომლობით საქართველოს ეკონომიკისა და მდგრადი განვითარების სამინისტროს სსიპ მეწარმეობის განვითარების სააგენტო ბიზნეს ფორუმის თანაორგანიზატორია და მასში ექსპორტის განვითარების ხელშეწყობასთან დაკავშირებით სააგენტოს დირექტორის, გიორგი ციკოლიას ხელმძღვანელობით ოცდაათამდე ქართული კომპანიის წარმომადგენელი იღებს მონაწილეობას.
ფორუმის გახსნის ცერემონიალზე საქართველოს პრეზიდენტი, გიორგი მარგველაშვილი დამსწრე საზოგადოებას მისასალმებელი სიტყვით მიმართავს. ამავდროულად, დაგეგმილია მეწარმეობის განვითარების სააგენტოს დირექტორის საქართველოს ეკონომიკურ და საინვესტიციო პერსპექტივებთან დაკავშირებული პრეზენტაციის გამართვა. რაც ყველაზე მნიშვნელოვანია, ამავე ღონისძიების მსვლელობისას დღის წესრიგით გაწერილია სააგენტოსა და სლოვაკეთის ბიზნეს სააგენტოს (Slovak Business Agency) შორის ურთიერთანამშრომლობის მემორანდუმის გაფორმება.
საქართველო-სლოვაკეთის ბიზნესფორუმში, როგორც ზემოთ აღინიშნა, ფორუმის მონაწილეთა შორის საკვები და სასმელი პროდუქციის წარმოების, ფარმაცევტიკის, სასტუმროების ქსელისა და სამშენებლო ინდუსტრიაში მოღვაწე ქართული კომპანიებიც არიან. ყველაფერთან ერთად, ფორუმზე წარმოდგენილი იქნება სხვადასხვა სახის პროდუქცია, რომელთა დეგუსტაციის საშუალება ღონისძიებაზე მყოფ სტუმრებს მიეცემათ. გარდა ამისა, ქართველი მეწარმეების მხრიდან პრეზენტაციებიც გაიმართება, რაც ხელს შეუწყობს მსგავსი მნიშვნელობის ღონისძიებაზე საქართველოს პოპულარიზაციას და ორ ქვეყანას, სლოვაკეთსა და საქართველოს, შორის სავაჭრო ურთიერთობების გაღრმავებისა და განმტკიცებას დაეხმარება.
