ფინანსთა სამინისტრო ეროვნულ ბანკსა და კომერციულ ბანკებს თხოვნით მიმართავს, დღეს მუშაობა განაახლონ. როგორც "ინტერპრესნიუსს" უწყებიდან აცნობეს, სამინისტროს თხოვნა განპირობებულია იმით, რომ საჭიროების შემთხვევაში გადარიცხვები არ შეფერხდეს.
"ფინანსთა სამინისტრო თხოვნით მიმართავს ეროვნულ ბანკსა და კომერციულ ბანკებს დღეს განაახლონ მუშაობა, რათა საჭიროების შემთხვევაში, არ შეფერხდეს გადარიცხვები", - აცხადებენ უწყებაში.
ფინანსთა სამინისტრო მზად არის, სტიქიის შედეგად მიყენებული ზარალის საბოლოო ოდენობის დადგენამდე მთავრობის სარეზერვო ფონდიდან 10 მლნ ლარი გამოყოს. შესაბამისი გადაწყვეტილება ფინანსთა სამინისტროში გამართულ სამუშაო თათბირზე მიიღეს, რომელსაც უწყების ხელმძღვანელი, ნოდარ ხადური ხელმძღვანელობდა.
"ფინანსთა სამინისტრო მუშაობის 24-საათიან რეჟიმზეა გადასული. ფინანსთა მინისტრმა ნოდარ ხადურმა გამართა სამუშაო თათბირი, რომელსაც ესწრებოდნენ მინისტრის მოადგილეები, ასევე საბიუჯეტო დეპარტამენტისა და ფინანსთა სამინისტროს მომსახურების სააგენტოს ხელმძღვანელები. ფინანსთა მინისტრმა დედაქალაქის მერის მოადგილე გიორგი ხელაიასგან მოისმინა ინფორმაცია ამჟამად არსებული ვითარების შესახებ. როგორც მინისტრმა განაცხადა, სამინისტრო დღეს უკვე მზადაა, ზარალის საბოლოო ოდენობის დადგენამდე, სტიქიის შედეგების სალიკვიდაციოდ, მთავრობის სარეზერვო ფონდიდან გამოყოს 10 მლნ ლარი", - აცხადებენ ფინანსთა სამინისტროში.