საქართველოს რეგიონული განვითარებისა და ინფრასტრუქტურის სამინისტროს გერმანიის რეკონსტრუქციისა და განვითარების ბანკის (KFW) დელეგაცია ესტუმრა. ბანკის კავკასიის რეგიონული ბიუროს დირექტორი ლარს ოერმანი და დელეგაციის სხვა წევრები რეგიონული განვითარებისა და ინფრასტრუქტურის მინისტრს ნოდარ ჯავახიშვილს შეხვდნენ. შეხვედრაზე მხარეებმა KFW-ს ფინანსური მხარდაჭერით მიმდინარე ინფრასტრუქტურული პროექტების შესახებ ისაუბრეს და სამომავლო თანამშრომლობის გეგმები დასახეს. სტუმრებმა განსაკუთრებული ყურადღება მყარი ნარჩენების მართვისა და წყალმომარაგების სისტემის რეაბილიტაციის სფეროში მიმდინარე და დაგეგმილ პროექტებზე გაამახვილეს.
გერმანიის რეკონსტრუქციისა და განვითარების ბანკი (KFW) საქართველოს რეგიონული განვითარებისა და ინფრასტრუქტურის სამინისტროს და მის საქვეუწყებო ორგანიზაციებს დახმარებას რამდენიმე მიმართულებით უწევს. კერძოდ, „საქართველოს მყარი ნარჩენების მართვის კომპანია“ KfW-ს ფინანსური მხარდაჭერით აშენებს ახალი საერთაშორისო სტანდარტების რეგიონულ სანიტარულ ნაგავსაყრელებს იმერეთის, სამეგრელო-ზემო სვანეთისა და კახეთის რეგიონებში. გარდა ამისა, კომპანიის დაფინანსებით საქართველოს მუნიციპალური განვითარების ფონდმა ზუგდიდში უკვე ააშენა 10 საცხოვრებელი კორპუსი იძულებით გადაადგილებულ პირთათვის.
