აჭარის ფინანსთა და ეკონომიკის სამინისტრომ უკრაინელ ბიზნესმენებს უმასპინძლა. ინვესტორებს მინისტრი დავით ბალაძე შეხვდა.
ვინიცის ოლქის დელეგაციის ვიზიტის მიზანი აჭარის საინვესტიციო პოტენციალის გაცნობა იყო. სამინისტროს წარმომადგენლებმა სტუმრებს რეგიონის საინვესტიციო კლიმატზე სპეციალური პრეზენტაცია წარუდგინეს.
ფინანსთა და ეკონომიკის სამინისტროს ინფორმაციით, შეხვედრაზე საუბარი ასევე შეეხო ქობულეთის თავისუფალ ტურისტულ ზონასაც.
დელეგაციას ვინიცის საოლქო სახელმწიფო ადმინისტრაციის გუბერნატორის პირველი მოადგილის მრჩეველი და „ვინიცის საქმიან ხალხთა კლუბის“ პრეზიდენტი ნადეჟდა ლისეცკაია ხელმძღვანელობდა. ორმხრივ შეხვედრაზე უკრაინელი ინვესტორები აჭარის რეგიონში ბიზნესის წარმოების რეგულაციებითა და გმირთა ხეივნის ტერიტორიით დაინტერესდნენ.
29-30 მაისს დაგეგმილი ვიზიტის ფარგლებში დელეგაციის წევრები აჭარის სავაჭრო-სამრეწველო პალატასაც ეწვევიან. უკრაინელი ინვესტორები რეგიონში მოღვაწე ბიზნესმენებს შეხვდებიან და აჭარაში ბიზნესის წარმოების თაობაზე მათ გამოცდილებას გაეცნობიან.
