2016 წლის ბოლომდე, ბათუმის სამრეწველო ზონაში ახალი საწარმო გაიხსნება. ამ მიზნით, აჭარის ფინანსთა და ეკონომიკის სამინისტრო სამრეწველო ზონაში მდებარე 413 კვ.მ შენობა-ნაგებობის და მასზე მიმაგრებული 1749 კვ.მ მიწის ნაკვეთს ყიდის. ობიექტის საწყისი ღირებულება 49 ათასი დოლარია და მისი გაყიდვა 12 ივნისისთვის ჩანიშნულ აუქციონზე იგეგმება.
საპრივატიზაციო პირობების მიხედვით, აუქციონში გამარჯვებული ვალდებულია შესაბამისი ხელშეკრულების გაფორმებიდან 12 თვის ვადაში საკუთრებაში გადაცემულ ქონებაზე საწარმო აამოქმედოს და სამეწარმეო საქმიანობა დაიწყოს.
ინვესტორი ვალდებულია ასევე, რომ პროექტის განხორციელებისათვის მინიმუმ 100 ათასი ლარის ინვესტიცია განახორციელოს და საწარმოს ამოქმედებიდან 1 თვის ვადაში, საწარმოში საქართველოს მინიმუმ 15 მოქალაქე დაასაქმოს და ობიექტის პროფილისა და დასაქმებულთა რაოდენობის შენარჩუნება არანაკლებ 5 წლის ვადით მოახდინოს.
