აჭარის ფინანსთა და ეკონომიკის მინისტრმა დავით ბალაძემ აჭარის რესპუბლიკური ბიუჯეტის პირველი კვარტლის შესრულებასთან დაკავშირებით უმაღლეს საბჭოში ანგარიში წარადგინა. გაერთიანებული სხდომა რეგიონის საკანონმდებლო ორგანოში კითხვა-პასუხის ფორმატით წარიმართა. მინისტრმა დეპუტატებს ბიუჯეტში გათვალისწინებული პროგრამების მიმდინარეობაზე დეტალური ინფორმაცია მიაწოდა.

აჭარის რესპუბლიკური ბიუჯეტის პირველი კვარტლის შემოსავლების გეგმა 37 938,5 ათასი ლარით განისაზღვრა, ფაქტიურმა შესრულებამ კი 44 857,7 ათასი ლარი შეადგინა და 118,2 %-ით შესრულდა.

2014 წლის ანალოგიურ მაჩვენებელთან (35 404,5 ათასი ლარი) შედარებით, შემოსავლების ფაქტიური შესრულება 9 453,2 ათასი ლარით, 26,7 %-ით არის გაზრდილი.

აჭარის რესპუბლიკური ბიუჯეტის 2015 წლის პირველი კვარტლის შემოსავლების უდიდესი ნაწილი, საერთო შემოსავლების 84,7% გადასახადებზე მოდის, რომელიც მხოლოდ საშემოსავლო გადასახადს მოიცავს. პირველი კვარტლის საშემოსავლო გადასახადის გეგმა 32 000,0 ათასი ლარით განისაზღვრა, ფაქტიურმა შესრულებამ კი 37 984,4 ათასი ლარი, გეგმის 118,7 % შეადგინა.

2014 წლის შესაბამის მაჩვენებელთან შედარებით (32 823,8 ათას ლარი), საშემოსავლო გადასახადი 5 160,6 ათასი ლარით,15,7 %-ით არის გაზრდილი.