ეროვნული ბანკის პრეზიდენტის გიორგი ქადაგიძის განცხადებით, მისი გუნდი დატოვებს გამართულ ინსტიტუტს ვალების გარეშე.
როგორც მან საფინანსო-საბიუჯეტო და დარგობრივი ეკონომიკის კომიტეტების გაერთიანებულ სხდომაზე, ეროვნული ბანკის 2014 წლის ანგარიშის წარდგენისას განაცხადა, ცრუ ბრალდებებზე საუბარს არ აპირებს.
"ეროვნულ ბანკს პირველად 1994 წლის შემდეგ ვალი აღარ აქვს. იმ გუნდს, რომლსაც ჩვენ გადავაბარებთ ეროვნული ბანკის ინსტიტუტს, ჩვენ ვაბარებთ გამართულ, აწყობილ ინსტიტუტს, ვალების გარეშე. რა თქმა უნდა, მე ამ აუდიტორიას არ ვაკადრებ იმ არასერიოზული ბრალდების ახსნას, თითქოს ჩვენ წინსწრებით დავფარეთ 400 მილიონი და ამან ხელი შეუწყო ლარის კურსს და ა.შ. ეს რა თქმა უნდა, სინამდვილეს არ შეესაბამება", - განაცხადა ქადაგიძემ.
ლარის გაუფასურების საკითხში ეროვნული ბანკის დადანაშაულებასთან დაკავშირებით, ქადაგიძე აცხადებს, რომ ერთი წუთითაც არ გადაუხვევია აღებული ვალდებულებებისგან.
,,ჩვენ ახლა ყველამ ერთად უნდა შევძლოთ სწრაფი და ეფექტური გადაწყვეტილებებით მივიღოთ იმგვარი შედეგი, რომელიც მაქსიმალურად შეუმსუბუქებს სესხის ტვირთს იმ ადამიანებს, რომლებსაც ეს კურსის ცვლილების გამო გაუძვირდათ. საუბარი ამაში ეროვნული ბანკის დადანაშაულებაზე და იმაზე, რომ ჩვენ რაიმე ფორმით ხელი შევუწყეთ ამ პროცესს, საუბარი განტევების ვაცის ძიებაზე, ეს, რა თქმა უნდა, არის ჩვენი ქვეყნისთვის, ინვესტორებისთვის საზიანო. მე ვერ წარმომიდგენია ამ პროცესებით ვინ შეიძლება იხეიროს.
ჩვენ დღეს ძალიან სერიოზულ ტექსტს ვაბარებთ როგორც ეროვნული ბანკის დამოუკიდებლობის თვალსაზრისით, ისე ინსტიტუტიციული განვითარების და ჩვენი პოლიტიკის რეაგირების კუთხით. თუ ამ ტესტს ვერ ჩავაბარებთ, დავიხევთ რამდენიმე წლით უკან. მერე მოგვიწევს ამ ყველაფრის გააზრება, გადაფასება და იგივე პროცესის განმეორება", - განაცხადა ქადაგიძემ.
