პრეზიდენტის ადმინისტრაციაში მიიჩნევენ, რომ ეროვნული ბანკიდან ზედემხედველობის სამსახურის გამოყოფის ინიციატივა პოლიტიკური გადაწყვეტილებაა, რაც მიუღებელია.
პრეზიდენტის ადმინისტრაციის უფროსის მოადგილისა და ეკონომიკური მრჩევლის გიორგი აბაშიშვილის განცხადებით, ამ ინიციატივას პროფესიულ მსჯელობასთან არანაირი კავშირი არა აქვს.
„ძალიან გასაკვირია, რატომ გახდა საჭირო მაინცდამაინც საბანკო სექტორთან მიმართებაში გარკვეული ტიპის რყევების გამოწვევის მცდელობა, გამომდინარე იქიდან, რომ ეს არის ყველაზე მეტად წარმატებული სექტორი და ბუნებრივია, ჩვენ ერთი რამ უნდა გავითვალისწინოთ, ამ სექტორზე ზეწოლა შესაძლოა თითოეულ მოქალაქეზე აისახოს,“ - განაცხადა აბაშიშვილმა.
დეპუტატების, თამაზ მეჭიაურისა და ნოდარ ებანოიძის საკანონმდებლო ინიციატივა, რომელიც საფინანსო ზედამხედველობის სააგენტოს ეროვნული ბანკის შემადგენლობიდან გამოყოფას ითვალისწინებს, პარლამენტის ბიუროს დღეს წარედგინა.
ცვლილება ამ მიმართულებით 13 კანონში ხორციელდება. როგორც პარლამენტის თავმჯდომარე დავით უსუფაშვილმა განაცხადა, საკითხის მიმართ ინტერესი დიდია.
უსუფაშვილმა კოლეგებს მოუწოდა, საკანონმდებლო პაკეტის განხილვა ყველა დაინტერესებული მხარის მაქსიმალური ჩართვით განხორციელდეს.
