კომპანია ”ეიერ-მერიდიანი” ბათუმის გარეუბანში მინიმუმ 220 ნომრიან სასტუმროს ააშენებს. კომპანიამ აჭარის ფინანსთა და ეკონომიკის სამინისტროს მიერ გამოცხადებულ აუქციონში გაიმარჯვა და 2 მლნ 91 ათას დოლარად კახაბრის დასახლებაში მდებარე 29 445 კვ.მ არასასოფლო-სამეურნეო დანიშნულების მიწის ნაკვეთი შეიძინა, სადაც სამომავლოდ ტურისტული ინფრასტრუქტურა უნდა გაშენდეს.

პირობების მიხედვითმ ”ეიერ-მერიდიანი” ვალდებულია, აღნიშნულ ტერიტორიაზე არანაკლებ 220 ნომრიანი სასტუმრო, არანაკლებ 600  აპარტამენტი, სამორინე, საკონფერენციო დარბაზი, სპორტულ-გამაჯანსაღებელი ცენტრი ააშენოს და  არანაკლებ 13 000 კვ.მ მიწის ნაკვეთზე სარეკრიაციო ზონა მოაწყოს, ავტოსადგომითა და სხვადასხვა ტიპის კვების ობიექტებით.
როგორც აუქციონის პირობაში იყო ჩადებული,  ინვესტორი ვალდებულია, ხელშეკრულების გაფორმებიდან 8 თვის ვადაში მრავალფუნქციური შენობა-ნაგებობის მშენებლობა დაიწყოს, ხოლო 14 თვის განმავლობაში სასტუმროსათვის განკუთვნილი შენობა-ნაგებო(ბე)ბის ნულოვანი ნიშნულის დასრულება  და 24 თვის ვადაში მრავალფუნქციური შენობა-ნაგებო(ბე)ბის ნულოვანი ნიშნულის დასრულება უზრუნველყოს.

სახელშეკრულებო პირობების მიხედვითვე,  ობიექტი ექსპლუატაციაში ხელშეკრულების გაფორმებიდან 48 თვის ვადაში უნდა შევიდეს, რაც ინვესტორს პირობების მიხედვით, მინიმუმ 30 მლნ დოლარი დაუჯდება.

ტურისტული ინფრასტრუქტურის  მშენებლობის შემდეგ,  ობიექტზე 300 ადამიანი დასაქმდება, საიდანაც არანაკლებ  80%-ი საქართველოს მოქალაქე უნდა იყოს.

ბათუმში, კახაბრის დასახლებაში მდებარე 29 445 კვ.მ არასასოფლო-სამეურნეო დანიშნულების მიწის ნაკვეთის საწყისი ღირებულება 2 მლნ 50 ათას დოლარი იყო.