მალტა და საქართველო ტურიზმის სფეროში ითანამშრომლებენ. საბოლო შედეგის მიღწევამდე და ახალი პროდუქტების შემუშავებამდე, ტურიზმის მიმართულებით ორივე ქვეყნის აღმასრულებელი ხელისუფლება ინტენსიურად იმუშავებს. როგორც საქართველოს პარლამენტის თავმჯდომარემ მალრას ტურიზმის მინისტრთან შეხვედრის შემდეგ განაცხადა, ტურიზმის მიმართულებით თანამშრომლობის მხრივ კონკრეტული დეტალები უკვე გამოკვეთილია.
„ძალიან კონკრეტული საკითხები გამოიკვეთა ტურიზმის მინისტრთან საუბრისას - როგორ შეიძლება, მალტამ და საქართველომ ერთმანეთი შეავსოს იმ ტურისტული პაკეტების შეთავაზებაში, რაც საინტერესო იქნება ევროპელი ტურისტებისთვის, ასევე, სხვა კონკრეტული საკითხები და შევჯერდით, რომ ამ თემაზე აღმასრულებელი ხელისუფლების წარმომადგენლები გააგრძელებენ ურთიერთობას“,- განაცხადა საქართველოს პარლამენტის თავმჯდომარემ. მისივე თქმით, შეთანხმდნენ იმაზეც, რომ მალტა საქართველოს პოზიციების აქტიური მხარდამჭერი იქნება და ევროკავშირთან ასოცირების გამოცდილებას გაუზიარებს.
საქართველოს პარლამენტის თავმჯდომარის თქმით, გააქტიურდება ურთიერთობები განათლების და ნაოსნობის სფეროშიც. „შევთანხმდით სხვა სფეროებში ურთიერთობების გააქტიურებაზეც, მაგალითად, განათლების სფეროში. მალტის დიპლომატიური აკადემია მსოფლიოში განთქმული დაწესებულებაა და ჩვენი საგარეო საქმეთა სამინისტრო უფრო მჭიდრო კონტაქტებს დაამყარებს ამ აკადემიასთან, ჩვენი დიპლომატების კვალიფიკაციის ამაღლების თვალსაზრისით. მალტას აქვს უნიკალური გამოცდილება და ცოდნა საერთაშორისო საზღვაო სამართლის და ზოგადად, ნაოსნობის სფეროში. როდესაც ვიწყებთ გაცილებით მძლავრი პორტების მშენებლობაზე საუბარს და იმ პროექტების რეალიზებას, რომელიც საქართველოს ჩართავს საერთაშორისო ტვირთბრუნვაში, გვჭირდება სათანადო სპეციალისტები და მალტის უმაღლესი სასწავლებლები მზად არიან, რომ დახმარება აღმოგვიჩინონ“, - განაცხადა დავით უსუფაშვილმა.
