თბილისის მუნიციპალიტეტის საკრებულოს დეპუტატები თამარ ტალიაშვილი და გულიკო ზუმბაძე, საქართველოს კულტურისა და ძეგლთა დაცვის მინისტრ - მიხეილ გიორგაძესთან და საქართველოს მეცნიერებათა ეროვნული აკადემიის პრეზიდენტთან -გიორგი კვესიტაძესთან ერთად, ბაქოში, მე-3 მსოფლიო კულტურათაშორის ფორუმში იღებენ მონაწილეობას.
2015 წლის ფორუმის მთავარი თემაა „კულტურა და მდგრადი განვითარება 2015 წლის შემდგომ პერიოდში“.
ფორუმი აერთიანებს მსოფლიოს ცენტრალური მთავრობების წარმომადგენლებს და საერთაშორისო ორგანიზაციებს, მინისტრებს, ექსპერტებსა და კეთილი ნების ელჩებს.
კულტურათაშორისი დიალოგის მე-3 მსოფლიო ფორუმის ფარგლებში იმართება მინისტერიალიც, რომელშიც საქართველოს დელეგაციის მხრიდან მონაწილეობს თბილისის საკრებულოს განათლებისა და კულტურის კომისიის თავმჯდომარე - თამარ ტალიაშვილი,
კულტურათაშორისი დიალოგის რიგით მესამე მსოფლიო ფორუმი ცნობილია „ბაქოს პროცესის“ სახელწოდებით. იგი წარმოადგენს ღია პლატფორმას, სადაც სხვადასხვა ქვეყნის წარმომადგენლები ერთმანეთს უზიარებენ კულტურის სფეროში მიღებულ ცოდნასა და გამოცდილებას. ეწყობა დისკუსიებიც და ფორუმში მონაწილე მხარეები საუბრობენ გლობალიზაციის პროცესში საერთო ღირებულებებზე. მონაწილეები მსჯელობენ კულტურული მემკვიდრეობის როლზე, მთავრობებისა და საერთაშორისო ორგანიზაციების პასუხისმგებლობაზე - განსხვავებული კულტურის ხალხთაშორის ურთიერთობებისას. ასევე ამახვილებენ ყურადღებას განსხვავებული აზრების, მსოფლმხედველობებისა და ინტერესების თანაარსებობის საკითხებზე და რელიგიური ლიდერების როლზე.
კულტურათაშორისო ფორუმი აზერბაიჯანში 2011 წლიდან ტარდება და ემსახურება სხვადასხვა ერის კულტურული მრავალფეროვნების პატივისცემას, ურთიერთგაგებას, ადამიანთა უფლებების დაცვას, სხვადასხვა კულტურისა და ტრადიციის, ასევე რელიგიური მრწამსის მქონე ადამიანების დაახლოებას და სამომავლო თანამშრომლობას.
ფორუმი იმართება აზერბაიჯანის მთავრობის პატრონაჟით და აზერბაიჯანის იუნესკოსთან, გაეროს ცივილიზაციების ალიანსთან, გაეროს მსოფლიო ტურიზმის ორგანიზაციასთან, ევროპის საბჭოსთან და ევროპის საბჭოს ჩრდილოეთ-სამხრეთის ცენტრთან თანამშრომლობით.
