სახელმწიფოს აუდიტის სამსახური, თანამდებობის პირებსა და სხვა თანამშრომლებზე დარიცხული სარგოს, დანამატისა და პრემიების კვარტალური ოდენობების შესახებ ინფორმაციას აქვეყნებს.
აღნიშნული ინფორმაციის თანახმად, მიმდინარე წლის პირველ კვარტალში, საქართველოს გენერალური აუდიტორის ლაშა თოდრიასთვის დარიცხული თანამდებობრივი სარგო 17 850 ლარს შეადგენს. გენერალური აუდიტორის პირველი მოადგილის ვანო ზარდიაშვილის კვარტალური თანამდებობრივი სარგო 16 800 ლარს, ხოლო გენერალური აუდიტორის მოადგილეების - გიორგი ჯანჯღავას, დევი ვეფხვაძისა და დავით მჭედლიშვილის თანამდებობრივი სარგო - 16 500 ლარს შეადგენს.
რაც შეეხება დეპარტამენტების უფროსებს, დეპარტამენტის 12 უფროსიდან თითოეულის კვარტალური ანაზღაურება 15 000-ს ლარს შეადგენს. დეპარტამენტის ერთ-ერთმა უფროსმა, დავით კაპანაძემ კვარტალური თანამდებობრივი სარგოს სახით - 16 200 ლარი, ხოლო ყველაზე მაღალი - 21 000 ლარი ვახტანგ კეჟერაძემ მიიღო.
ყველაზე დაბალი ანაზღაურება კვარტალურად სამსახურის უფროს ზურაბ აზნაურაშვილს ერგო. მისი თანამდებობრივი სარგო მიმდინარე წლის პირველ კვარტალში, 7 500 ლარს შეადგენდა.
სხვა თანამშრომლების ხელფასი აუდიტის სამსახურის ინფორმაციით, 1819456.5 ლარს შეადგენს, ჯამში კი, თანამდებობრივ სარგოებზე პირველი კვარტლის პერიოდში, სულ 2128306.5 ლარია დახარჯული. მათგან 150 900 ლარი დარიცხული პრემიებია.
ამასთან, უწყებამ სამსახურის შტატგარეშე მოსამსახურეებზე (ჯამურად), შრომის ანაზღაურების სახით, 40 330 ლარი გასცა. რაც შეეხება სამივლინებო ხარჯებს, აუდიტის სამსახურის ინფორმაციით, მიმდინარე წლის პირველი კვარტლის მონაცემებით, თანამდებობის პირების ქვეყნის გარეთ მივლინებებში 11634.29 ლარი, ხოლო სხვა თანამშრომლების მივლინებებისთვის - 10138.18 ლარი დაიხარჯა. აქედან, 14 676 ლარი ქვეყნის შიგნით მივლინებებზეა დახარჯული.
