ლარის გაუფასურების საკითხის შემსწავლელი საპარლამენტო კომისია შისწავლის არა მხოლოდ ეროვნული ბანკის, არამედ მთავრობის ეკონომიკური გუნდის საქმიანობასაც და არ არის გამორიცხული რომელიმე მათგანის პასუხისმგებლობის საკითხი დადგეს. ამის შესახებ, საპარლამენტო უმრავლესობის წევრმა ანი მიროტაძემ „რეპორტიორში“ გამართულ პრესკონფერენციაზე განაცხადა.
„საგამოძიებო კომისიის შექმნა არ უკავშირდება მხოლოდ ქადაგიძის საქმიანობას, არამედ ეს კომისია შეისწავლის ლარის გაუფასურების მიზეზებს. პარლამენტში ასევე მიიწვევენ მთავრობის ეკონომიკური გუნდის წარმომადგენლებს, რომლებიც დეპუტატების შეკითხვებს უპასუხებენ”,- განაცხადა დეპუტატმა.
მისივე თქმით, მმართველი კოალიციის მთავრობა შეძლებს ქვეყანაში არსებული ეკონომიკური პრობლემების დაძლევას, რის შემდეგაც „ქართული ოცნების“ რეიტინგი რამდენიმე პუნქტით მოიმატებს. დეპუტატი ვარაუდობს, რომ ივნისის ბოლოდან ქვეყაში ეკონომიკური ვითარება სასიკეთოდ შეიცვლება.
„ველოდებით ინვესტიციებს, პრივატიზაციიდან შემოსული თანხების ბიუჯეტში მობილიზებას, ასევე უმნიშვნელოვანესი ფაქტი იყო ევროპის რეკონსტრუქციისა და განვითარების ბანკის კონფერენცია. დანარჩენი დამოკიდებუელია საქართველოს ხელისუგლებაზე, რამდენად შევძლებთ უცხოელი ინვესტორებისთვის ჩვენი ქვეყნის გაცნობას“, - დასძინა ანი მიროტაძე.
