გურიაში გომისმთაზე ტურისტული ინფრასტრუქტურის შექმნა იგეგმება, საუბარია მის სამთო სათხილამურო კურორტადაც ქცევაზე. როგორც ქვეყნის პრემიერ-მინისტრმა ირაკლი ღარიბაშვილმა განაცხადა, გომისმთას უნიკალური რესურსი გააჩნია და ის დღეისათვის აუთვისებელია.
”იგი მდებარეობს ზღვის დონიდან 2250 მეტრზე. აქ შეზავებულია ზღვისა და მთის ჰაერი, არის მინერალური წყლები. მისი განუმეორებელი ბუნება და ჭინჭაოს ტბა დაუვიწყარ შთაბეჭდილებას ტოვებს. გომის მთა უხვთოვლიანია და სამთო-სათხილამურო სპორტის განვითარებისთვის იდეალური რელიეფი აქვს. ჩვენი მიზანი ინვესტორების დაინტერესებაა. მნიშვნელოვანია ინვესტიციების მოზიდვა გომის მთის ზამთრის კურორტად ჩამოყალიბების მიზნით. იმისათვის, რომ ეს ადგილები ტურისტებისთვის მიმზიდველი გავხადოთ, უნდა შეიქმნას შესაბამისი გარემო და მოეწყოს ინფრასტრუქტურა. წელს პირველად განხორციელდა გზის ნაწილობრივი რეაბილიტაცია. იმედია, ეს კურორტი, ურეკთან ერთად, იქნება ყველაზე საინტერესო ადგილი ადგილობრივი და უცხოელი ტურისტებისთვის”,- აღნიშნა ირაკლი ღარიბაშვილმა.
პრემიერ-მინისტრის თქმით, ტურისტული პოტენციალის მხრივ რეგიონს შთამბეჭდავი პოტენციალი აქვს.
”შავიზღვისპირეთში მდებარე კურორტები - ურეკი, შეკვეთილი და გრიგოლეთი, ხოლო მაღალმთიან ალპურ ზონაში - ბახმარო და გომისმთა მართლაც უნიკალური რესურსია და აქ შესაძლებელია როგორც ზაფხულის, ისე ზამთრის ტურიზმის განვითარება. თქვენ იცით ურეკის უმდიდრესი ბუნებრივი რესურსის - სამკურნალო თვისებების მქონე მაგნიტური ქვიშის შესახებ და კარგად მოგეხსენებათ, თუ რამხელა პერსპექტივა აქვს ამ კურორტს”,- აღნიშნა ღარიბაშვილმა.
აღსანიშნავია, რომ გომისმთა გარშემორტყუმულია წიწვოვანი ტყითა და წყაროებით, კურორტს უკვე ათწლეულებია ადგილობრივები დასასვენებლად იყენებენ.
