ფინანსთა მინისტრის ნოდარ ხადურის ინფორმაციით, საქართველოში ინვესტიციების სავარაუდო მოცულობა გაორმაგდა. მისი თქმით, EBRD-ის რეგიონულმა დირექტორმა ბრუნო ბალვანერამ განაცხადა, რომ ამ სამი დღის განმავლობაში, დაიდო იმდენი ხელშეკრულება, რამდენიც სამი თვის განმავლობაში.
მინისტრის განმარტებით, გარდა იმ კონკრეტული ინვესტიციებისა, რომლის განხორციელებასაც უშუალოდ EBRD აპირებს, მიმდინარეობს შეხვედრები ბიზნესის წარმომადგენლებთან, ბიზნესწინადადებები კი ინვესტიციებად მყისიერად არ გარდაიქმნება.
„იყო შეხვედრები, რომლებსაც უკვე მოყვა კონკრეტული ინვესტიციები, რაც ასე აინტერესებს საქართველოს მოსახლეობას. მაგალითად, ჯანდაცვის სფეროში - უკვე დაიდო ხელშეკრულება EBRD-სა და „ავერსს“ შორის და ახალი ჰოსპიტალი აშენდება საქართველოში. ასევე, დაიდო რამდენიმე ხელშეკრულება კერძო კომპანიებს შორის, რაც ძალიან მნიშვნელოვანია“, -განაცხადა ნოდარ ხადურმა.
ფინანსთა მინისტრმა ორმხრივი შეხვედრებიდან განსაკუთრებით გამოყო შეხვედრა იაპონიის ფინანსთა მინისტრთან, ასევე უკრაინელ კოლეგასთან და ლატვიის დელეგაციასთან. მისივე თქმით, შეხვედრები ასევე გაიმართა სარეიტინგო კომპანიებთან და ბანკებთან.
