უკრაინის ფინანსთა მინისტრმა ნატალია იარესკომ ქართველ კოლეგასთან, საქართველო-უკრაინას შორის სავაჭრო ურთიერთობების გაზრდაზე ისაუბრა. ნოდარ ხადურთან შეხვედრის შემდეგ სტუმარმა განაცხადა, რომ უკრაინას სურს, გააგრძელოს თანამშრომლობა საქართველოსთან და გაიზიაროს საუკეთესო პრაქტიკა.
უკრაინული დელეგაციის სახელით, მან მადლობა გადაუხადა ქართველ ხალხს მასპინძლობისთვის და აღნიშნა, რომ ჰქონდა შესანიშნავი შეხვედრები საქართველოს მთავრობის წარმომადგენლებთან და ეროვნული ბანკის ხელმძღვანელობასთან.
„ფინანსთა მინისტრთან ვისაუბრეთ ჩვენი სავაჭრო ურთიერთობების შესახებ, როგორ უნდა გავზარდოთ ვაჭრობა უკრაინასა და საქართველოს შორის. ჩვენ ვისაუბრეთ გამოცდილების გაზიარებაზე, საგადასახადო სისტემების წარმატებული რეფორმების შესახებ. გამიმართლა, რომ ფინანსთა მინისტრმა აეროპორტიდან წამიყვანა საბაჟოზე. მე მინდოდა, ჩემი თვალით მენახა ის გამჭვირვალე სისტემა, რომელიც საქართველოს აქვს. ჩვენ გვსურს თანამშრომლობის გაგრძელება, ვისწავლოთ საქართველოსგან და გავიზიაროთ საუკეთესო პრაქტიკა, რაც თქვენს ქვეყანას აქვს,“ - განაცხადა უკრაინის ფინანსთა მინისტრმა და აღნიშნა, რომ უკრაინა ამჟამად ახორციელებს ძირეულ ცვლილებებს საგადასახადო ადმინისტრირებისა და საბაჟო სფეროებში და ქართული გამოცდილება ამ მხრივ ძალიან წაადგებათ.
