ევროპის რეკონსტრუქციისა და განვითარების ბანკის პრეზიდენტის სუმა ჩაკრაბატის შეფასებით, საქართველოს ეკონომიკა საკმაოდ მდგრადად ვითარდება. როგორც მან დღეს გამართულ პრესკონფერენციზე განაცხადა, მიუხედავად იმისა, რომ საქართველოს ეკონომიკური ზრდის პროგნოზი 2,3%-მდე შემცირდა, რეგიონისთვის ეს ყველაზე კარგი პროგნოზია.
„ვვარაუდობთ, რომ ეს საშუალოდ იქნება 1, 8%, ეს იქნება საშუალო საქართველოსთვის. თუ დავუბრუნდებით იანვარს, რისკები გაიზარდა. ეს არის რეცესიით გამოწვეული, რომელსაც რუსეთში ჰქონდა ადგილი. მიუხედავად ამისა, მიმაჩნია, რომ საქართველოს ეკონომიკა საკმაოდ მდგრადად ვითარდება იმ გარემოში, რომელშიც მას ყოფნა უხდება“, - განაცხადა სერ სუმა ჩაკრაბატიმ.
მისივე თქმით, საქართველოს ეროვნულ ბანკსა და მთავრობას დიდი ხანი არ დასჭირდება, რათა საქართველომ თავისი პოტენციალი განავითაროს.
„აქ ეკონომიკური საფუძვლები საკმაოდ გონივრულია. რაც შეეხება ფისკალურ დეფიციტს, საქართველოს მთავრობა ცდილობს, რომ გარკვეულწილად, აკონტროლოს ეს ფინანსები, „მოიჭიროს ქამრები“, თუმცა, აუცილებელია სხვა ღონისძიებები. ვფიქრობ, მთავრობას აქვს საკმაოდ კარგი გეზი აღებული, რომ ეს პრობლემები მოაგვაროს და ამას აკეთებს კიდეც“, - განმარტა სტუმარმა.
შეგახსენებთ, EBRD-მა საქართველოს ეკონომიკური ზრდის პროგნოზი 4, 8%-დან 2, 3%-მდე შეამცირა.
