საქართველოსა და იტალიას შორის სავაჭრო-ეკონომიკური ურთიერთობების შესახებ ისაუბრა ვიცე-პრემიერმა, ეკონომიკისა და მდგრადი განვითარების მინისტრმა გიორგი
კვირიკაშვილმა თავის იტალიელ კოლეგასთან პიერ კარლო პადოანთან შეხვედრაზე. EBRD-ის ფორუმის ფარგლებში თბილისში ჩამოსულ იტალიის დელეგაციას ქვეყნის
ეკონომიკისა და ფინანსთა მინისტრი ხელმძღვანელობს.
,,პიერ კარლო პადოანი, იტალიის ეკონომიკისა და ფინანსთა მინისტრი არის ძალიან გამოცდილი ადამიანი, ძალიან ბევრი საერთაშორისო ინსტიტუტის ბორდშია ნამუშევარი და აქვს უდიდესი გამოცდილება. გვქონდა ძალიან საინტერესო საუბარი სამომავლო ურთიერთობებზე. ჩვენ გვაქვს 300 მილიონი დოლარის სავაჭრო ბრუნვა წელიწადში, ასევე გვაქვს ძალიან ბევრი საინვესტიციო ურთიერთობა. განსაკუთრებით მნიშვნელოვანია იტალიასთან ურთიერთობა ინფრასტრუქტურის მიმართულებით“ - განაცხადა გიორგი კვირიკაშვილმა.
მინისტრის თქმით, რეგიონული განვითარებისა და ინფრასტრუქტურის სამინისტროსთან ერთად მზადდება ძალიან მნიშვნელოვანი საინვესტიციო პორტფელი მომავალი წლების ინვესტიციებისთვის. „ეს არის 3 მილიარდის ოდენობის საინვესტიციო პორტფელი და ამ მიმართულებით თანამშრომლობა გვექნება იტალიურ კომპანიებთან, ვინაიდან იტალიას აქვს მთიანი რეგიონების დაგეგმარების განსაკუთრებით კარგი გამოცდილება. ამ მიმართულებით იტალიასთან გვექნება ძალიან სასარგებლო და ნაყოფიერი თანამშრომლობა,–‘’აღნიშნა ვიცე-პრემიერმა.
,,ის ფაქტი, რომ EBRD-ის ყოველწლიური სამიტი საქართველოში ტარდება, მოწმობს იმაზე, თუ რამხელა პოტენციალი გააჩნია ამ ქვეყანას, როგორც ევროპული ოჯახის ნაწილს. ჩვენ აქ ვართ იმისთვის, რომ მხარი დავუჭიროთ საქართველოს შემდგომ პროგრესს ევროპაში და ასევე, კონკრეტულად ჩემი ქვეყნის, იტალიის გადმოსახედიდან განვამტკიცოთ ის ძალიან კარგი ეკონომიკური ურთიერთობები, რომლებიც ჩვენს ქვეყნებს შორის არსებობს. დიახ, ვფიქრობ, რომ იტალიური კომპანიებისთვის საქართველოში არის ძალიან კარგი შესაძლებლობა ინვესტიციების განსახორციელებლად. ექსპორტის ხელშეწყობის, ტრანსპორტისა და ინფრასტრუქტურის კუთხით ძალიან კარგად შეიძლება ვითანამშრომლოთ საქართველოსთან“ - განაცხადა იტალიის ეკონომიკისა და ფინანსთა მინისტრმა.
დღეისათვის საქართველოსა და იტალიას შორის თანამშრომლობა აქტიურად მიმდინარეობს ვაჭრობის, სამოქალაქო ავიაციის, ტრანსპორტის, ტურიზმისა და ეკონომიკის სხვა მნიშვნელოვან სფეროებში. იზრდება იტალიასთან სავაჭრო ბრუნვის, ასევე ექსპორტისა და იმპორტის მაჩვენებლები. 2015 წლის 4 თვის მონაცემებით, გაზრდილია იტალიიდან შემოსული ვიზიტორების რაოდენობაც. არსებული მონაცემებით, იტალიიდან საქართველოში შემოსული ინვესტიციების ოდენობა, ამ ეტაპისთვის, 263.18 მლნ. აშშ დოლარს შეადგენს.
