დღევანდელი მდგომარეობით, საქართველოსთვის EBRD-ის დაფინანსება 2,6 მლრდ ევროა 170-ზე მეტი პროექტის ფარგლებში, საიდანაც დაფინანსების 83 პროცენტი კერძო სექტორზე მოდის. როგორც საქართველოს პრემიერ-მინისტრმა EBRD-ის ყოველწლიური შეხვედრის გახსნისას განმარტა, ბანკის დაფინანსებით საქართველოში მრავალი მსხვილი პროექტი განხორციელდა.
”მინდა ჩამოვთვალო რამდენიმე მსხვილი პროექტი, რომელიც ბოლო პერიოდში ევროპის რეკონსტრუქციისა და განვითარების ბანკის თანადაფინანსებით განხორციელდა. ბანკის მიერ ჩადებული თანხები შეადგენს:
- შუახევის ჰიდროელექტროსადგურის განვითარების, მშენებლობისა და ოპერირების პროექტში - 86.5 მილიონ დოლარს; ისეთი დიდი კომპანიის წილი, როგორიცაა ,,TATA ჯგუფი“ – 90 მილიონ დოლარს;
- შავი ზღვის ელექტროგადამცემი ქსელის პროექტში - 80 მილიონ ევროს;
- ,,ვისოლ პეტროლეუმ ჯორჯიას“ პროექტებში - 65 მილიონ დოლარს;
- ჯვარი-ხორგის გადამცემი ხაზების მშენებლობის პროექტში - 47 მილიონ ევროს.
- სასტუმროს მშენებლობისა და ოპერირების პროექტში - 18 მილიონ დოლარზე მეტი.
გარდა ამისა, ძალიან მნიშვნელოვანია, რომ ბანკმა გამოთქვა სხვა პროექტებში მონაწილეობის ინტერესი.
ჩვენთვის მნიშვნელოვანი პროექტების მხარდაჭერა ხორციელდება ბევრ სექტორში, - დაწყებული წარმოებითა და გარემოს დაცვის მიმართულებით, დამთავრებული სოფლის მეურნეობითა და საბანკო სფეროთი”, აღნიშნა ირაკლი ღარიბაშვილმა.
როგორც პრემიერ-მინისტრმა შეხვესრაზე სიტყვით გამოსვლისას თქვა, განხორციელებული პროექტებიდან განსაკუთრებით აღსანიშნავია ნოვატორული პროექტი, რომელიც გულისხმობს ბანკის მიერ ლარში დენომინირებული ფასიანი ქაღალდების გამოშვებას, რამაც სტიმული მისცა სხვა საფინანსო ინსტიტუტებს, რომლებმაც მალევე მიბაძეს მას.
”ყოველივე ამის საშუალებით საფინანსო ინსტიტუტებს ეძლევათ შესაძლებლობა გასცენ სესხები ლარში, რაც ხელს უწყობს ეკონომიკის ლარიზაციასა და კაპიტალის ბაზრის განვითარებას.
გარდა ამისა, ჩვენ ძალიან ვაფასებთ ბანკის ძალისხმევას, რომელიც მიმართულია ჩვენი მეზობელი ქვეყნების განვითარებისკენ, რადგან რეგიონში პოლიტიკური, ეკონომიკური და სოციალური სტაბილურობის ზრდა ამ რეგიონის ყველა ქვეყნისთვის სასარგებლოა”,- განმარტა ირაკლი ღარიბაშვილმა.
