საქართველოს ფინანსთა მინისტრი ნოდარ ხადური ექსპერტებს მოუწოდებს, ლარის კურსთან დაკავშირებით, არამოტივირებული შეფასებებისაგან თავი შეიკავონ. მისი თქმით, იმედია, ლარის კურსი არათუ დასტაბილურდება, არამედ უკან დაიწევს.
"მინდა, ყველა ექსპერტს ვთხოვო, რომ თავი შეიკავოს აბსოლუტურად არამოტივირებული და არაარგუმენტირებული შეფასებებისგან. ჩვენი ეროვნული ვალუტის გაუფასურება არის სერიოზული პრობლემა, გამოწვეულია გარე შოკებით. საქართველოს მთავრობამ არაერთხელ განაცხადა, რომ ყველაფერს აკეთებს, რათა უახლოეს მომავალში კურსის დასტაბილურება მოხდეს. მეტიც, ჩვენ იმედი გვაქვს, რომ ის არათუ დასტაბილურდება, კურსმა უკან უნდა დაიწიოს", - განაცხადა მინისტრმა.
მისივე შეფასებით, ეკონომიკური ფაქტორების გარდა, ეროვნული ვალუტის კურსზე გავლენას ფსიქოლოგიური ფაქტორებიც ახდენს.
,,გარდა ეკონომიკური ფაქტორებისა, გაცვლით კურსზე ფსიქოლოგიური ფაქტორებიც ახდენს გავლენას, ამიტომ მინდა, ვთხოვო იმ ადამიანებს, რომლებსაც აქვთ პრეტენზია, რომ შეუძლიათ ყველაფერზე გააკეთონ კომენტარი - მათი განცხადებები იყოს უფრო არგუმენტირებული და ემყარებოდეს იმ ინფორმაციას, სტატისტიკურ მონაცემებს, რომლებიც რეალურად არსებობს", - დასძინა ნოდარ ხადურმა.
