მეწარმეობის განვითარების სააგენტოს ორგანიზებით, არაბთა გაერთიანებულ საემიროებში ქართული კომპანიების წარმოებული პროდუქციის წარდგენა გამოფენაზე „Gulfood 2015" კომპანია "ჯორჯიან პროდაქტ რენესანსისთვის" ნაყოფიერი აღმოჩნდა. თხილის მწარმოებელი ადგილობრივი კომპანიის პროდუქციით ფრანგი ბაიერი დაინტერესდა, შედეგად ჩამოვიდა თბილისში და აპრილის დასაწყიში ესტუმრა ქარხანას, ასევე სურვილი გამოთქვა თხილის გულის, ბლანშირებული თხილისა და სხვა სახის პროდუქციის შესყიდვასთან დაკავშირებით.
"ჯორჯიან პროდაქტ რენესანსი" პირველი სერტიფიცირებული კომპანიაა ხობის რაიონში, რომელიც თანამედროვე ტექნიკითა და დანადგარებითაა აღჭურვილი. კომპანიას მინიჭებული აქვს ISO ხარისხის მართვის სერთიფიკატი, რაც თავის მხრივ, მუშაობის მაღალი სტანდარტების გარანტია და ხარისხის უმაღლესი დონის არსებობაზე მიუთითებს.
რაც შეეხება თავად გამოფენას „Gulfood 2015", ერთ-ერთი უმსხვილესი და პრესტიჟული ყოველწლიური გამოფენაა, რომელიც საუკეთესო საშულებას წარმოადგენს კომპანიებისთვის ბიზნესის გასაფართოებლად და პროდუქციის პოპულარიზაციისათვის. სწორედ ხსენებული ღონისძიება გახდა ქართული კომპანიისადმი დაინტერესების საფუძველი და მეწარმეობის განვითარების სააგენტოს ძალისხმევით მოხერხდა საჭირო კონტაქტების მოძიება, კავშირის უზრუნველყოფა და საერთაშორისო სარბიელზე კომპანიის პროდუქციის გატანისთვის ინფორმაციული კუთხით დაკვალიანება, რაც საბოლოო ჯამში ხელშესახები შედეგის მომცემი გახდა მეწარმეობის სფეროში კიდევ ერთი წინ გადადგმული ნაბიჯის კუთხით.
