EBRD-ის ყოველწლიური შეხვედრისა და ბიზნესფორუმის ფარგლებში, საქართველოს ეროვნულ ბანკს მონღოლეთის ფინანსთა სამინისტროს დელეგაცია - სახელმწიფო მდივნის განცოგთ ხურელბაატარის ხელმძღვანელობით ეწვია. მონღოლეთის ფინანსთა სამინისტროს დელეგაცია ეროვნული ბანკის ვიცე-პრეზიდენტმა არჩილ მესტვირიშვილმა მიიღო.
დელეგაციის ეროვნულ ბანკში ვიზიტის მთავარი მიზანია, გაეცნონ ფასიანი ქაღალდების აუქციონების ბლუმბერგის სიტემით ჩატარების და ანგარიშსწორების პროცესს. ინფორმაციისთვის, ანალოგიური სამუშაო შეხვედრა გასულ წელსაც გაიმართა, რის შემდეგაც მონღოლეთმა მიიღო გადაწყვეტილება სახელმწიფო ფასიანი ქაღალდების გაყიდვა სწორედ ბლუმბერგის სიტემის მეშვეობით დაიწყოს.
„ეს არ არის პირველი შემთხვევა, როდესაც საქართველოს ეროვნული ბანკისა და ბლუმბერგის თანამშრომლობით შექმნილი სისტემები წარმატებით ინერგება სხვა ქვეყნებშიც. საქართველოს მაგალითზე და ჩვენი დადებითი გამოცდილების გათვალისწინებით ბლუმბერგზე, როგორც საუკეთესო სავაჭრო სისტემაზე სტრატეგიული აქცენტი გასულ წლებში აზერბაიჯანისა და მოლდავეთის ცენტრალურმა ბანკებმაც გააკეთეს“, - განაცხადა ეროვნული ბანკის ვიცე-პრეზიდენტმა არჩილ მესტვირიშვილმა.
