13 მაისს, EBRD-ის ყოველწლიური შეხვედრისა და ბიზნესფორუმის ფარგლებში, მსოფლიოს წამყვანი ბრიტანული ფინანსური ჟურნალის The Banker-ის ევროპის რედაქტორმა სტეფანი ლინჰარტიმ საქართველოს ეროვნული ბანკის პრეზიდენტს ევროპის საუკეთესო ცენტრალური ბანკირის ჯილდო გადასცა.

ჟურნალმა The Banker, რომელსაც Financial Times Group ფლობს, ევროპის 2014 წლის  ცენტრალური ბანკის საუკეთესო მმართველად საქართველოს ეროვნული ბანკის პრეზიდენტი გიორგი ქადაგიძე დაასახელა.

ეროვნული ბანკის პრეზიდენტმა, ჟურნალ The Banker-ის ევროპის რედაქტორს სტეფანი ლინდჰარტს მადლობა გადაუხადა ეროვნულ ბანკში სტუმრობისა და ჯილდოს გადაცემისთვის.

„მადლობა მინდა გითხრათ თქვენ, ეროვნული ბანკის გუნდს, ეს ნომინაცია აღიარებაა და დაფასებაა თითოეული თქვენგანის მაღალი პროფესიონალიზმის, პასუხისმგებლობისა და პატრიოტიზმის.

ეროვნული ბანკის აღიარება ისეთი პოპულარული და პრესტიჟული  გამოცემის მიერ, როგორიც The Banker-ია, მნიშვნელოვანი წარმატებაა ქვეყნისათვის, ესაა მესიჯი ინვესტორებისათვის, რომ ამ ქვეყანაში განვითარებული, ძლიერი, საერთაშორისო სტანდარტების შესაბამისი ინსტიტუტებია, ესაა ნიშანი, რომ ამ ქვეყნის ფინანსური სექტორი სანდო და ღირსეული პარტნიორია ნებისმიერი დასავლური ტიპის ორგანიზაციისათვის.

რა თქმა უნდა, საქართველოს მოქალაქეებს დღეს უამრავი სოციალური პრობლემა აქვთ. ისინი ჩვენგან ნომინაციებში გამარჯვებისა და მილოცვების მიღების ნაცვლად პრობლემების მოგვარებას ითხოვენ. თუმცა უნდა აღვნიშნოთ, რომ პრობლემების გადაჭრის გასაღები სწორედ ძლიერ ინსტიტუტებშია, სადაც ქვეყნის და მისი მოქალაქეებისათვის სასიკეთო გადაწყვეტილებებს პასუხისმგებლობით აღსავსე მოხელეები იღებენ. მე ამაყი ვარ, რომ ეროვნულ ბანკში სწორედ ასეთი გუნდი მუშაობს. კიდევ ერთხელ გილოცავთ თქვენი შრომის აღიარებას“, - განაცხადა ეროვნული ბანკის პრეზიდენტმა გიორგი ქადაგიძემ.

მსოფლიოს ერთ-ერთი ავტორიტეტული გამოცემა, ყოველწლიურად იკვლევს და ავლენს წამყვან ფინანსურ ინსტიტუტებს და საუკეთესო ბანკირებს 149  ქვეყანაში. გამარჯვებულთა შეფასება წინა წლის მონაცემზე დაყრდნობით ხდება. The Banker-ის ყოველწლიური დაჯილდოება ავლენს იმ ხელმძღვანელ პირებს, რომლებმაც თავიანთი ქვეყნის ეკონომიკის ზრდის სტიმულირებას და სტაბილიზაციას საუკეთესოდ გაართვეს თავი.

ინფორმაციისთვის, გასული წლის დაჯილდოების ცერემონიალზე, რომელიც ლონდონში გაიმართა, ევროპის საუკეთესო ბანკირის წოდება ჩეხ მიროსლავ სინგერს მიანიჭეს.

The Banker მსოფლიოს პირველი საბანკო და საფინანსო რესურსია, რომელსაც 180 ქვეყანაში კითხულობენ.