ევროპის რეკონსტრუქციისა და განვითარების ბანკის (EBRD) მიმდინარე წლის შეხვედრებსა და ბიზნესფორუმს საქართველო მასპინძლობს, რომლის ფარგლებშიც, 14 მაისს, საქართველოს ეკონომიკისა და მდგრადი განვითარების სამინისტროს ორგანიზებით EBRD-ის მასპინძელი ქვეყნის საინვესტიციო სესია გაიმართება.
საინვესტიციო სესია 2015 წლის EBRD-ის ღონისძიების მეორე დღის განრიგის განუყოფელი შემადგენელი ინსტიტუციური ნაწილია, სადაც მიიღება საკვანძო გადაწყვეტილებები ბანკის სამომავლო საქმიანობასა და პრიორიტეტული მიმართულელბების კუთხით.
სესიის ფორმატი ითვალისწინებს არაფორმალურ დისკუსიას გადაწყვეტილების მიმღებ პირებსა და ინვესტორებს შორის, რომლის მთავრი ამოცანაა საინვესტიციო პერსპექტივებთან დაკავშირებული ინფორმაციის განხილვის პროცესში წაახალისოს აუდიტორიის მაქსიმალური ჩართულობა და მონაწილეებს სიღრმისეულად გააცნოს ქვეყნის საინვესტიციო კლიმატი, ამასთანავე, რეგიონში მისი ცენტრალური როლის შესახებ უზრუნველყოს ინფორმაციის მიწოდება.
სესია მოიცავს საქართველოს ეკონომიკის ხედვის პანელსა და საქართველოს ბაზარზე მოქმედი კომპანიების წარმატებული ისტორიების განყოფილებას, რომლის ფარგლებშიც, ეროვნულ თუ საერთაშორისო კომპანიებს ეძლევათ საშუალება გაუზიარონ საკუთარი წარმატებები დამსწრე საზოგადოებას და გაცვალონ ინფორმაცია აუდიტორიასთან.
აღნიშნულ ღონისძიებასთან დაკავშირებით, საქართველოს ვიზიტით ეწვევა ტელეკომპანია CNN-ის განვითარებადი ბაზრების განყოფილების რედაქტორი ჯონ დეფტერიოსი, რომელიც საინვესტიციო სესიაზე მოდერატორის რანგში იქნება წარმოდგენილი.
ჯონ დეფტერიოსი სპეციალიზებულია განვითარებადი და BRIC-ის სახელმწიფოთა ჯგუფის მზარდ ეკონომიკასთან დაკავშირებულ ბიზნეს ინფორმაციის გაშუქებაზე და CNN-ის ახლო აღმოსავლეთის საბაზრო პროგრამის წამყვანი ფიგურაა. დაგროვილი აქვს 20 წელზე მეტი გამოცდილება საფინანსო განხრით ახალ ამბებზე მუშაობის კუთხით; იყო ისეთი მოვლენების ეპიცენტრში, როგორებიცაა სპარსეთის ყურის ომი, ბერლინის კედლის დაცემა, დიდი რვიანის (G8) სამიტები ლონდონის, ვაშინგტონის, ნიუ-იორკის, ლოს-ანგელესის, რომისა და ახლო ახმოსავლეთის მასშტაბით. აგრეთვე, ის არის მსოფლიო ეკონიმკური ფორუმის მედია წამყვანი, არაბული სამყაროს თემებზე გლობალური დღის წესრიგის საბჭოს წევრიცაა და ამავდროულად, მსოფლიო ლიდერებისა და უმაღლესი ოფიციალური პირების ექსკლუზიური ინტერვიუების ავტორია.
ყველაფრის გათვალისწინებით, საქართველოსთვის საკმაოდ მნიშვნელოვანია ჯონ დეფტერიოსის დონის ჟურნალისტის მასპინძლობა, რაც ქვეყნის ცნობადობის ამაღლების კუთხით ერთმნიშვნელოვნად პოზიტიური მოვლენაა. EBRD-ის საინვესტიციო სესიის მასპინძლობა კი საუკეთესო საშუალებაა საქართველოს საინვესტიციო გარემოსა და საექსპორტო პოტენციალის შესახებ სხვადასხვა ქვეყნის გავლენიანი წარმომადგენლებისა და მსხვილი კომპანიებისათვის ინფორმაციის მისაწოდებლად, ასევე, ბიზნეს გარემოს უპირატესობების წარმოსაჩენად, რაც თავის მხრივ, ცალსახა წინაპირობაა საქართველოს პოპულარიზაციისთვის. უფრო მეტიც, ხსენებული ფორუმი ხელსაყრელია ინვესტორების მოზიდვისა და საზღვრებს მიღმა კავშირების დამყარებით უცხოელ კოლეგებთან გრძელვადიანი და მტკიცე პარტნიორობის ჩამოსაყალიბებლადაც.
