13 მაისს, ევროპის რეკონსტრუქციისა და განვითარების ბანკის ყოველწლიური კონფერენციის ფარგლებში საქართველოს სტუმრობენ სინგაპურის საერთაშორისო სააგენტოს (International Enterprise Singapore) სტამბულის ფილიალის დირექტორი მაბელ ნეო და ევროპის მიმართულების ჯგუფის ხელმძღვანელი ანა ჰო, რომლებთანაც დღეს, 11:00 საათზე, საქართველოს ეკონომიკისა და მდგარდი განვითარების სამინისტროში გაიმართება შეხვედრა, მეწარმეობის განვითარების სააგენტოს დირექტორის, გიორგი ციკოლიასა და მინისტრის მოადგილე, ქეთევან ბოჭორიშვილის მონაწილეობით.
სინგაპურის საერთაშორისო სააგენტო საქართველოს მეწარმეობის განვითარების სააგენტოს იდენტური პროფილის საჯარო უწყებაა, რომელიც კონცენტრირებულია საგარეო ეკონომიკის მიმართულებაზე და ხელს უწყობს საერთაშორისო ვაჭრობის განვითარებას. ამავდროულად, ორიენტირებულია ინვესტორების მოზიდვასა და ადგილობრივი მცირე და საშუალო ბიზნესის წახალისებისა თუ საჭირო მომსახურების უზრუნველყოფის საშუალებით კონკურენტუნარიანი კომპანიების ჩამოყალიბებაზე. გარდა ამისა, სააგენტო 35 ლოკაციაზე განლაგებული საერთაშორისო ქსელის მეშვეობით უზრუნველყოფს განვითარებად ბაზრებზე სათანადო წვდომის შესაძლებლობას.
ხსენებული სააგენტოსა და საქართველოს მხარის საქმიანი შეხვედრა მიზნად ისახავს სამომავლო თანამშრომლობის პერსპექტივებისა და მოცემული კუთხით ურთიერთობის გაღრმავების მექანიზმებთან დაკავშირებით დეტალების განხილვას. ამასთანავე, მხარეები იმსჯელებენ საქართველოში მეწარმეობის კუთხით განვითარებულ ბოლოდროოინდელ ვითარებაზე და ურთიერთთანამშრომლობისთვის ხელსაყრელი სექტორების განსაზღვრაზე, რათა სინგაპურის მხარეს საშუალება მიეცეს საქართველოში კაპიტალდაბანდებისა თუ სხვადასხვა აქტივობაში ჩართულობის მხრივ მიიღოს ამომწურავი ინფორმაცია და დასახოს სამომავლო გეგმები.
