ეროვნული ბანკის ყოფილი პრეზიდენტის რომან გოცირიძის თქმით, ყველაზე უცნაური ის არის, რომ საქართველოს ბიუჯეტი 2 მილიარდით გაიზარდა, მაგრამ რეალურად სიღარიბემ იმატა. ეს განცხადება გაჟღერდა გადაცემა „არჩევანში“. ტელეგადაცემაში განიხილებოდა NDI-ს კვლევა, რომლის მიხედვითაც რესპონდენტების უმრავლესობას სამუშაო ადგილები, ფასების ზრდა და სიღარიბე აწუხებს. ტერიტორიული მთლიანობის საკითხი მხოლოდ მე-4 პოზიციას იკავებს.
„ყველაზე უცნაური ის არის, რომ ჩვენი ბიუჯეტი, რომელიც იყო 2012-ში 8 მილიარდი ლარის ფარგლებში, დღეს არის 10 მილიარდი. ის 2 მილიარდით გაიზარდა, მაგრამ რეალურად ვხედავთ, რომ სიღარიბემ იმატა“. - განაცხადა გოცირიძემ.
მან ასევე აღნიშნა, რომ არ ახსენდება მოქმედი მთავრობის არცერთი პრაქტიკული გადაწყვეტილება, რომელიც სწრაფად შეაჩერებდა დევალვაციას. ამასთანავე ეროვნული ბანკის ყოფილმა პრეზიდენტმა ხაზი გაუსვა, რომ „საშუალო და მცირე ბიზნესს ძალიან გაუჭირდა და იხურება მრავალი სავაჭრო ობიექტი“.
ლარის კურსთან დაკავშირებით პროგნოზის გაკეთებაზე რომან გოცირიძემ თავი შეიკავა და აღნიშნა, რომ ეს ბევრ ფაქტორზე არის დამოკიდებული.
