საქართველოს ბიზნეს ასოციაციის პრეზიდენტის გიორგი ჭირაქაძის განცხადებით, საინვესტიციო საბჭოს შექმნა ძალიან მნიშვნელოვანია. მისი თქმით, ერთი წელია, უკვე საინვესტიციო საბჭოს შექმნასთან დაკავშირებით, ევროპის რეკონსტრუქციისა და განვითარების ბანკთან (EBRD) ერთად მუშაობენ.
როგორც ჭირაქაძემ მთავრობის კანცელარიაში პრემიერ-მინისტრ ირაკლი ღარიბაშვილისა და ევროპის რეკონსტრუქციისა და განვითარების ბანკის პრეზიდენტის სერ სუმა ჩაკრაბარტისთან შეხვედრის დასრულების შემდეგ განაცხადა, ბიზნესისა და ხელისუფლების აქტიური კომუნიკაცია პრობლემებთან დაკავშირებით ძალიან მნიშვნელოვანია.
„ძალიან მნიშვნელოვანია, რაც დღეს ხდება. მახსოვს, EBRD-ის ხელმძღვანელობის ინიციატივა როდესაც წამოვიდა ამ საბჭოსთან დაკავშირებით, ჩვენ მაქსიმალური მხარდაჭერა გვქონდა.
ბიზნესისა და ხელისუფლების აქტიური კომუნიკაცია პრობლემებთან დაკავშირებით არის ძალიან მნიშვნელოვანი, რომ მოხდეს ამ ფორმატით, რა ფორმატითაც EBRD-ის პრეზიდენტმა და საქართველოს პრემიერმა შესთავაზა საზოგადოებას. ქვეყანაში ბევრი რეალური პრობლემის განხილვა, რაც ბიზნესში არსებობს, ამ თემების განხილვა უშუალოდ პრემიერთან მოხდება,“ - განაცხადა გიორგი ჭირაქაძემ.
საინვესტიციო საბჭოს პრემიერ-მინისტრი ირაკლი ღარიბაშვილი უხელმძღვანელებს.
