ეროვნული ბანკის პრეზიდენტის გიორგი ქადაგიძის განცხადებით, ვერანაირი საგამოძიებო კომისია და ზეწოლა ვერ აიძულებს მიიღოს ქვეყნის საწინააღმდეგო გადაწყვეტილებები. ამის შესახებ მან ჟურნალისტებს იმ კითხვის საპასუხოდ განუცხადა, რომლის თანახმადაც, პარლამენტის საფინანსო-საბიუჯეტო კომიტეტის თავმჯდომარე თამაზ მეჭიაურმა ეროვნული ბანკის ქმედებების შესასწავლად საგამოძიებო კომისიის შექმნა არ გამორიცხა.
"ყველასთვის ცხადია, ეს არის ზეწოლა ეროვნულ ბანკზე, რომ დახარჯოს სავალუტო რეზერვი. მე გავუმარტივებ ამოცანას ამ იდეის ავტორებს და ვიტყვი, რომ ჩვენ არ ვაპირებთ სავალუტო რეზერვების განიავებას, გაფლანგვას. ეს არის არასწორი გადაწყვეტილება. ის, რომ ეს გადაწყვეტილება არასწორია და ხშირ შემთხვევაში დამღუპველი, მსოფლიო ეკონომიკის ისტორიაში არაერთხელ დადასტურებულა. მარტივად კიდევ ერთხელ მინდა ხაზი გავუსვა იმ გარემოებას, რომ სავალუტო რეზერვი არ არის ჩვენი ან ეროვნული ბანკის საკუთრება. ჩვენი ქვეყნის სავალუტო რეზერვი არის თითოეული ჩვენი მოქალაქის, ჩვენი შვილების მატერიალური დოვლათი, გარანტი იმისა, რომ ჩვენი ქვეყნის ფინანსური სისტემის სტაბილურად ფუნქციონირებას არაფერი ემუქრება. ეს არის გარანტი იმისა, რომ ამ ქვეყანაში 90-იანი წლები არ განმეორდება არასდროს",- განაცხადა ქდაგიძემ.
მისივე თქმით, რეზერვების ხარჯვა, არ არის პრობლემების გადაჭრის გზა.
"პრობლემების გადაჭრა არის სხვაგან და ამაზე და სხვა ყველა დეტალზე მექნება საუბარი წლიური ანაგრიშის დროს, როდესაც პარლამენტში წარვსდგები", - აღნიშნა ქადაგიძემ და დასძინა, რომ ეროვნული ბანკი ყველაფერს აკეთებს არსებული გამოწვევების მოსახლეობისთვის მაქსიმალურად შემსუბუქებისთვის
